چیئرمین سعودی پاکستان جوائنٹ بزنس کونسل،سعودی عرب بلوچستان اٹی زرکاری نا بابت پبی است خواہی نا درشانی

کراچی، سعودی عرب بلوچستان اٹی زرکاری و کسبکار ہیومن ریسورس ءِ روزگار نا وارخواہی فراوان کننگ اٹی است خواہی نا درشانی ءِ کرینے، سعودی پاکستان جوائنٹ بزنس کونسل نا چیئرمین شہزادہ منصور بن محمد آل سعود 10 باسکی بڑزکو کہولی سعودی واپاری ڈَل اتون اوار کراچی اٹی حکومت بلوچستان نا بڑزکو کہولی ڈَل اتون اوڑدہی کرے، ہرانا کماشی ءِ بلوچستان بورڈ آف انویسٹمنٹ اینڈ ٹریڈ نا وائس چیئرمین بلال خان کاکڑ کرے۔ دیوان اٹی ایم ڈی بی ٹیوٹا عبدالکبیر زرکون و ایم ڈی لیڈا لیاقت کاشانی ہم ساڑی ئس۔ دیوان اٹی بلوچستان اٹی زرکاری نا تالان وارخواہی و چندی شونداری ڈٹ آتیا جم بریفنگ تننگا۔ شرہ کروک ڈٹ آتیٹی کم بی ٹی یو گیس آن یوریا کھد تیار کننگ نا کمپلیکس، فیروکروم پلانٹ، لائیڈا نا صنعتی شونداری گمان، بلیو اکانومی، زیتون نا کشار، لائیو اسٹاک فارمنگ، معدنیات و توانائی نا بشخ آتیٹی زرکاری نا ڈٹ آک اوار ئسر۔ شہزادہ منصور بن محمد آل سعود بلوچستان اٹی زرکاری نا ڈٹ آتیٹی عملی بشخ ہلنگ و تیار ڈٹ آتیٹی زرکاری نا ارادگی نا درشانی ءِ کرے۔ او سعودی عرب اٹی بلوچستان نا کسبکار بندغ آتیکن روزگار نا وارخواہی ودی کننگ و دا رد اٹ پیشرفت ءِ ترند کننگ نا ہم باور کرفے۔ او دا گام ءِ حکومت بلوچستان کن اسہ خاص ءُ ٹیکی اس گوندا۔ دا وخت آ بلال خان کاکڑ پارے کہ صوبہ ٹی معدنیات، توانائی، کشت وکشار‘ لائیو اسٹاک، کرّکی زرگزران و صنعتی بشخ آتیٹی زرکاری نا کمک اٹ نئے بیرہ زرگزرانی سرجز آتے شون تننگ مریک بلکہ ہندی کہول آ روزگار نا تالان وارخواہیک ہم ودی کننگ مننگ کیرہ۔ او پارے کہ وزیراعلیٰ بلوچستان میر سرفراز بگٹی نا وژن صوبہ ءِ ملکی و جہانی زرکاری و واپاری نا اہم ہند جوڑ کننگ ءِ، وخت اس کہ حکومت بلوچستان زرکار آتے وس انا کچ آسراتی فراوان کننگ و کاروبار دوست چاگڑد جوڑ کننگ کن سنبرینگوک ءِ۔ او سعودی واپاری ڈَل ءِ بلوچستان اٹی زرکاری کن دوئی وارخواہی تیاں پبی فائدہ ہرفنگ نا سلہ خلسا پارے کہ بلوچستان بورڈ آف انویسٹمنٹ زرکار آتے ڈٹ آتا نشاندہی، تعلقدار ادارہ تتون رابطہ و زرکاری نا عمل اٹی آسراتی فراوان کننگ کن تینا کڑد ءِ ادا کیک۔