برشور، توبہ کاکڑی ٹی چرس انا تیار فصل ءِ ہمو جاگہ غا خاخر تننگا

برشور، ڈپٹی کمشنر برشور فلائٹ لیفٹیننٹ (ر) خالد شمس نا خصوصی پارت آ اسسٹنٹ کمشنر توبہ کاکڑی معید جاموٹ نا کماشی ٹی تدوک آ دے مر انگا سیمی علاقہ غاتیٹی منشیات نا برخلاف اسیجائی کریک ڈاؤن کننگا، ہراٹی ضلعی پولیس، محکمہ ایکسائز و اینٹی نارکوٹکس فورس بشخ ہلسا توبہ کاکڑی ٹی چرس انا تیار فصل ءِ جاگہ غا ہی خاخر ترسا بھس کریر۔ دا آپریشن نا بنداوی مسخت ضلع نا الس و ورنا چین ءِ منشیات نا بھسکاری آن بچفنگ ءِ‘ دا وخت آ اسسٹنٹ کمشنر معید جاموٹ و ضلعی پولیس آفیسر (ڈی پی او) عبدالستار دشتی اسیجائی ارادگی نا درشانی ءِ کرسا پیدوار کریر کہ راج آن دا ناچوڑ نا چٹفنگ و شاری تا رکھ ننا اولیکو اولیت ءِ۔ اوفک غیرتی الس، عالم دین و متبر آتیان دا مہم اٹی پبی کمکاری و السی مخ تفی نا خواست کرسا معلومدار کریر کہ رکھی فصل آتا دسنگ و منشیات بہا کننگ نا موار آتا برخلاف بے فرق و سخت کانودی کارروائی کننگک۔