جامعہ گوادر کچ اٹنگا وسیلہ غاتیان پد بھی بڑزکو کہولی تعلیم کن کوشست کننگ ءِ،پروفیسر عبدالرزاق صابر

گوادر، جامعہ گوادر نا فنانس اینڈ پلاننگ کمیٹی نا ہشتمیکو دیوان وائس چانسلر پروفیسر ڈاکٹر عبدالرزاق صابر نا کماشی ٹی پاک چائینہ ٹیکنیکل اینڈ ووکیشنل انسٹیٹیوٹ نا کانفرنس روم اٹی اڈ ہلک، ہراٹی جامعہ نا مالی باندات‘ بجٹ نا اولیت‘ انتظامی گرج‘ مالیاتی پالیسی و آخبت نا شونداری ڈٹ آتا جاچ ءِ ہلنگا۔ دیوان اٹی پرو وائس چانسلر پروفیسر ڈاکٹر سید منظور احمد، رجسٹرار ڈاکٹر دولت خان، ڈین فیکلٹی آف سوشل سائنسز پروفیسر ڈاکٹر جان محمد، ڈائریکٹر فنانس رحمت اللہ، ڈائریکٹر کوالٹی انہانسمنٹ سیل ڈاکٹر رابعہ اسلم و ڈائریکٹر آفس آف ریسرچ، انوویشن اینڈ کمرشلائزیشن ڈاکٹر محمد ارشاد بشخ ہلک۔ داکان بیدس محکمہ خزانہ حکومت بلوچستان نا نمائندہ عمیر رؤف، ہائر ایجوکیشن کمیشن اسلام آباد نا نمائندہ سہیل ہمایوں خان، و گورنر سیکریٹریٹ نا نمائندہ حافظ نور ویڈیو لنک نا کمک اٹ دیوان اٹی بشخ ہلکر۔ دا وخت آ وائس چانسلر پروفیسر ڈاکٹر عبدالرزاق صابر تینا خیال آتا درشانی ءِ کرسا پارے کہ مالی نظم و ضبط، شفافیت، بھرمی ڈٹ بندی و وسیلہ غاتا گچین وڑ اٹ کاریم اٹ اتنگ بڑزکوتعلیمی ادارہ نا مدامگی شونداری و سرسہبی نا بنداوی تمبہ مریک‘ او پارے کہ جامعہ گوادر کچ اٹنگا وسیلہ غاتیان پد ہم آب اٹو بڑزکو تعلیم نا شون تننگ، تدریسی و پٹ وپولی سرجز آتا ودفنگ‘ انتظامی پنجر نا سوگوی و ادارہ ئی واکداری ٹی ودکی کن پدریسہ کوشست کننگ اٹی ءِ۔ وائس چانسلر مستی پارے کہ جامعہ نا شونداری و مالیاتی اولیت آتا بنداوی مسخت تعلیمی آب ءِ بڑز کننگ، طالب علم آتے گچین آسراتی فراوان کننگ و ڈیہہ اٹ بڑزکو تعلیم نا ودوک آ خواست آتتون ہم گرنچ سوگو و فعال تعلیمی ادارہ اسے نا ٹہیفنگ ءِ پک کننگ ءِ۔ دیوان اٹی جامعہ نا مالی وتواجہی‘ ادارہ ئی سوگوی و آخبت نا شونداری گرج آتا رد اٹ سلاہ تیا جم سجفنگا۔