47 سال آن ہیت کپروک اِرا ملک ءِ مذاکرات آ اتنگ ننا سرسہبی اسے،ترجمان دفتر خارجہ

اسلام آباد، پاکستان اسہ وار ولدا پیدوار کرینے کہ ڈیہہ و جہانی کہول آ امن و سوگوی نا برجائی‘ جنگ و بے چیٹی نا جاگہ غا سیاسی مذاکرات، سفارت کاری و تین پہ تینی افہام و تفہیم نا کمک اٹ مننگ کیک۔ پاکستان اسہ زموار ءُ ریاست و خیرخواہ اسے نا وڑ اٹ ڈیہہ انا جھیڑہ غاتا ایسری، چک وتاڑ اٹ کمتی و جنگ کروک فریق آتے مذاکرات نا میز آ اتنگ کن تینا سفارتی کوشست آتے برجا تخک۔ پاکستان 47 سال آن اسہ ایلو تون ہیت کپروک اِرا ملک ءِ مذاکرات نا میز آ تولفنگ اٹی اہم کڑد ادا کرے، وخت اس کہ اسلام آباد اٹی مفاہمتی یادداشت آ سرسہب دستخط پاکستان نا سفارتی کوشست آتا پیدوار شاہدی ءِ۔ مذاکرات و خیرخواہی نا عمل اٹی وخت لگنگ کیک، ولے پاکستان ءِ اومیت ءِ کہ آخر ڈیہہ اٹی امن و سوگوی مریک‘ ترجمان دفتر خارجہ سجاد حیدر خان ہفتہ وار میڈیا بریفنگ اٹی پاکستان نا داسہ نا سفارتی سرجز، نیامی دے ٹک نا حالیت، پاک چین تعلقداری، بھارت، اوغانستان، سعودی عرب، ایران، امریکہ و ایلو ڈیہہ و جہانی باندات آ پاکستان نا موقف ءِ بیان کرسا پارے کہ پاکستان ایلو ملک آتے ہم اسہ پلیٹ فارم اسے آ اتسا امن و سوگوی نا بابت ہیت و گپ نا وارخواہی فراوان کرے۔ ڈیہہ اٹ امن بیرہ پاکستان نا آخا بلکہ مچ آ ڈیہہ و اوڑان پیشن نا ملک آتا فائدہ اٹی ءِ۔ ترجمان دفتر خارجہ پارے کہ 23 اکتوبر آ نائب وزیراعظم و وزیر خارجہ اسحاق ڈار استنبول اٹی پاکستان، ترکیہ، مصر و سعودی عرب نا وزیرخارجہ غاتا آر فور وزارتی دیوان اٹی بشخ ہلک۔ دیوان اٹی فلسطین، یمن، امریکہ، اسرائیل و ایران نا نیام اٹی چک وتاڑ تون اوار نیامی دے ٹک نا جم حالیت آ جم گپ وتران کننگا۔ اسحاق ڈار دیوان اٹی فلسطینی الس نا حقِ خودارادیت و آجو و وتواجہ فلسطینی ریاست کن پاکستان نا مخ تفی نا دوارگی ءِ کرے۔ پاکستان موقف تینائی کرے کہ فلسطینی ریاست 4 جون 1967ء نا سیم تا رِد اٹ جوڑ کروئی تمک‘ ہرانا بنجا دے ٹکی بیت المقدس مرے۔ دیوان اٹی غزہ ٹی بیدادی نا دمدستی ایسری و بیدس اڑاند انسانی کمک نا فراوانی آ ہم زور شاغنگا۔ آر فور ملک آتا وزیرخارجہ غاک سعودی عرب و بحرہ احمر اٹ حوثی جلہو تا مذمت ءِ کرسا ڈیہہ انا جھیڑہ غاتا ایسری کن مذاکرات و سفارت کاری ءِ المی گوندا۔ آبنائے ہرمز آن رکھوک و بیدس اڑاند بحری ہن و بر ءِ پک کننگ آ ہم زور شاغنگا۔