اوآئی سی ملک آتا واپار و برآمد آتا مونی دننگ کن اسیجائی حکمت عملی المی ءِ،جام کمال خان

استنبول، بنجائی وزیر واپار جام کمال خان او آئی سی باسک ملک آتیا زور شاغانے کہ او تین پہ تینی واپار نا مونی دننگ، برآمد آتیٹی ودکی، چنکا و نیامی درجہ نا کاروبار(ایس ایم ایز) ءِ مالی آسراتی تا فراوانی و زرگزرانی کمکاری ءِ سوگو کننگ کن اسیجائی و عملی گام گیج کیر۔ اوپارے کہ ساڑی جہانی زرگزرانی و جغرافیائی سیاسی چیلنج آتا رداٹ اسلامی ملک آتا نیام اٹ اقتصادی یکجہتی و پالیسی تیٹی ہم گرنچی المی ءِ۔ اوداہیت ءِ استنبول اٹی اقتصادی وواپاری کمکاری نا قائمہ کمیٹی (کامسیک) نا 42 می وزارتی دیوان نا اخریکو سیشن آن او آئی سی باسک ملک آتا نمائندگی ءِ کرسا تران اٹی کرے۔ دیوان نا کماشی ءِ ترکیہ نا نائب صدر جودت یلمازکرے۔ بنجائی وزیر جام کمال خان پارے کہ او آئی سی ملک آک قدرتی وسیلہ، جغرافیائی اہمیت و انسانی زر انا پتداری ٹی گیشتر زرگزرانی کچ تخرہ، ہرادے گچین شریداری و پالیسی تا کمک اٹ اسیجائی شونہالی ٹی بدل کننگ مریک۔ اوواپاری فنانسنگ نا گچین نظام ءِ برآمد آتیٹی ودکی کن اہم گوندسا پارینے کہ خاص وڑ اٹ چنکا و نیامی درجہ نا کاروباری ادارہ غاتے مالی آسراتی تا دوئی کننگ اٹ ول ویچڑ ضابطہ کار، بھلا ضمانتی خواست و زیات خڑچ کون آ ویل مون تروک ءِ۔ دارداٹ واپاری مالیاتی وڑ اٹ وڑ پہ وڑی‘ برآمدی وام تا ضمانت، اسلامی مالیاتی نظام نامونی دننگ و ڈیجیٹل واپاری آسراتی تے ودفنگ نا گرج ءِ۔ جام کمال خان کسٹمز و بینکاری نظام ءِ ڈیجیٹل وڑاٹ گچین کننگ، الیکٹرانک واپاری دستاویز و ون ونڈو پلیٹ فارم آتا کاریم اٹ اتنگ آ زور شاغسا پارے کہ داگام گیج آتیان واپاری خڑچ کم و سیم انا ایپار آن آسان جوڑ کننگ مریک۔ اوزالبول و ورناتا کاروباری ادارہ غاتتون اوار ایس ایم ایز کن خصوصی مالیاتی آسراتی، کریڈٹ گارنٹی، تکنیکی کمکاری و جہانی منڈی تسکان رسینگ ءِ گچین جوڑ کننگ نا گرج آ ہم زور شاغا۔