سویلی ایشیا ٹی مدامگی امن کن کشمیر ویل انا انصاف اٹ ایسری المی ءِ،صدر آصف علی زرداری

اسلام آباد، صدر مملکت آصف علی زرداری پارینے کہ قطبی ایشیا ٹی مدامگی امن و سوگوی کن جموں و کشمیر نا ویل انا انصاف اٹ ایسری المی ءِ، پاکستان کشمیری الس نا حقِ خودارادیت نا مخ تفی و کشمیر ناویل انا پرامن ایسری کن تینا اصولی موقف آ سلوک ءِ۔ او جہانی برادری آ زور شاغا کہ او بھارت نا کانود آن چَپ کوزہ ٹی جموں و کشمیر اٹی انسانی حق آتا لتاڑنگ ءِ چٹفنگ و جہانی مبصر آتے بے اڑاند آن رسینگ گیگ تننگ کن کڑد ادا کے۔ یومِ شہدائے جموں نا وخت آ تینا کلہو اٹی صدر مملکت نومبر 1947ء اٹی جموں اٹی شہید مروک بے گناہ کشمیری مسلمان تے خراجِ عقیدت پیش کرسا پارے کہ شہدائے جموں نا بھلا قربانی تے ہچ گہس گیرام کننگ مفک‘ او زہمی خاہوت آتتون ہم یکجہتی نا درشانی ءِ کرے۔ صدر آصف علی زرداری پارے کہ 79 سال مست ڈوگرہ فوج جموں نا مسلم آبادی نا برخلاف منظم بیدادی کریر، ہرانا نتیجہ ٹی ہزار آ نرینہ، زالبول و چناک شہید مسر وخت اس کہ بے حساب بندغ آتے تینا اُرا و باوہ پیرہ ئی آ علاقہ غاتیان بیوس کرسا کشنگا۔ او پارے کہ کشمیری الس اینو ہم مشکل آتا گواچی ءِ و بھارت نا کانود آن چَپ کوزہ ٹی جموں و کشمیر اٹی انسانی حق آتا لتاڑنگ برجاءِ۔ جہانی برادری ءِ کشمیری الس نا خواری تا سنجیدگی اٹ نوٹس ہلوئی تمک۔ صدر مملکت پیدوار کرے کہ پاکستان کشمیری الس نا اخلاقی، سیاسی و سفارتی مخ تفی ءِ برجا تخک و کشمیر نا ویل انا انصاف اٹ و پرامن ایسری کن تینا کوشست آتیان پدی مفک۔ بھارت نا بابت صدر آصف علی زرداری پارے کہ اودے خارتس بیان و عسکری مہم جوئی آن پاناد کروئی تمک۔ پاکستان امن نا خواہندار ءِ، ولے تینا وتواجہی، ڈیہہ انا سلامتی و الس نا رکھ آ ہچ ءُ سمجھوتہ اس کپک۔ او پارے کہ مذاکرات کن پاکستان نا ارادگی ءِ نزوری سرپند مف۔