جہانی زرگزرانی چیلنج آتیان پد ہم السی آسراتی اہم ءِ، اسحاق ڈار

اسلام آباد، نائب وزیراعظم اسحاق ڈار پارینے کہ جہانی زرگزرانی چیلنج آتیان پد ہم السی آسودہی و لس شاری تے آسراتی فراوان کننگ حکومت نا اولیت ءِ، کل سیاسی جماعت آتتون پدریسہ ہیت و گپ المی ءِ۔ ترجمان دفتر خارجہ نا رِد اٹ نائب وزیراعظم اسحاق ڈار و لیاقت بلوچ نا کماشی ٹی جماعت اسلامی نا ڈل انا نیام اٹ اوڑدہی مس۔ اوڑدہی ٹی ملک اٹی پٹرولیم نا نہاد آتتون تعلقدار باندات آتیا گپ وتران کننگا۔ لس بندغ ءِ ریلیف فراوان کننگ نا عملی گام گیج آتیا جم گپ و تران مس و کم کٹیا کروک شاری تیا زرگزرانی باریم ءِ کم کننگ کن سلاہ تا جاچ ءِ ہلنگا۔ اوڑدہی ٹی توانائی نا نہاد و السی ریلیف تون تعلقدار لائحہ عمل پک کننگ کن سلابت ءِ بروک آ دے تیٹی ہم برجا تخنگ آ امنائی مس۔ اسحاق ڈار پارے کہ جہانی زرگزرانی چیلنج آتیان پد ہم السی آسودہی و لس شاری تے آسراتی فراوان کننگ حکومت نا اولیت ءِ، قومی زرگزرانی چیلنج آتتون مون تننگ کن کل سیاسی جماعت آتا نیام اٹی پدریسہ ہیت و گپ المی ءِ۔ اوڑدہی ٹی وزیر ڈٹ بندی، وزیراعظم نا سلاہکار بین الصوبائی رابطہ، خصوصی کمکار طارق باجوہ، سیکرٹری خزانہ و اسپیشل سیکرٹری پٹرولیم ہم ساڑی ئس۔