قائداعظم محمد علی جناح نا پامدار سرکڑدہ ئی نن کن روشنا ءُ کسر اسے،اسسٹنٹ کمشنر اوستا محمد

اُستا محمد، ڈپٹی کمشنر اُستا محمد محمد رمضان پلال نا خصوصی پارت آ اسسٹنٹ کمشنر اُستا محمد ماریہ شمعون گورنمنٹ گرلز کالج اُستا محمد اٹی یومِ قائد اعظم نا رد اٹ اڈ ہلوک شرفدار دود اٹی بشخ ہلک۔ دود اٹی کالج نا پرنسپل، تدریسی کارندہ و مسڑ طالب علم آک بشخ ہلکر۔ دود اٹ مسڑ طالب علم آک بانیِ پاکستان قائد اعظم محمد علی جناح نا شخصی و سیاسی بصیرت، جہد، اصول پسندی و کماشی ءِ خراجِ عقیدت پیش کننگ کن کیہی سرحال آتیا تران و زیبائی اٹ ٹیبلو پیش کریر۔ طالب علم آک تینا پرفارمنس نا کمک اٹ قائداعظم نا زند نا اہم پہلو، تحریکِ پاکستان اٹی اونا تاریخی کڑد و قیامِ پاکستان کن تروک بھلا قربانی تے پیدوار کریر‘ دا وخت آ دود اٹی قومی جوزہ، حب الوطنی و قائداعظم تون عقیدت نا درشانی نمان ئس۔ دا وخت آ اسسٹنٹ کمشنر ماریہ شمعون مسڑ طالب علم آتا جوان کارکڑد‘ پت و تخلیقی لائخی تا ستاءِ کرسا اوفتا است بڈی ءِ کرے۔ او تینا تران اٹی پارے کہ قائداعظم محمد علی جناح نا بے مٹ جہد، عزم و استقلال، اصول پسندی و مدبرانہ کماشی نن کن روشنا ءُ درور اسےِ۔ ورنا چین، خاص وڑ مسڑ طالب علم آک بایدے قائد اعظم نا فکر و نظریہ غان راہشونی دوئی کرسا تینا زند اٹی خواری، نظم و ضبط، ایمانداری و تینے آ پت ءِ تینائی کیر۔ او پارے کہ تعلیم قوم اسے نا شونداری و شونہالی نا بنداوی ضمانت ءِ، ہندا سوب آن طالب علم آک تینا کل چکار ءِ علم انا دوئی کننگ آ کیر و پوسکنوڑ تعلیم تون اوار اخلاقی قدر آتے ہم شون ایتر تاکہ آخبت اٹی ملک و قوم انا شونداری ٹی تینا گچین کڑد ءِ ادا کننگ کیر۔ اسسٹنٹ کمشنر مستی پارے کہ قائد اعظم نا تروک نہادی اصول سیوت، ایمان و نظم و ضبط اینو ہم ننا قومی زند اکن کسر نا ڈیواءِ‘ ننے دا اصول آتے بیرہ رسم و تران تسکان کچ اٹ تخنگ نا جاگہ غا تینا عملی زند انا بشخ جوڑ کروئی تمک۔ او طالب علم آتیا زور شاغا کہ او ملک اتون مہر، قومی یکجہتی، تین پہ تینی شرف و خذمت خلق نا جوزہ ءِ شون ایتر و اسہ خوانندہ، لائخ و سوگو پاکستان نا تفنگ اٹی تینا کڑد ءِ ادا کیر۔ اخیر اٹ مسڑ طالب علم آتا کنڈآن پیش کروک پروگرام آتا ستاءِ کننگا و دا ارادگی نا درشانی کننگا کہ پوسکن آ چین ءِ قائد اعظم نا نظریات، جہد و پاکستان نا جوڑ کننگ نا مسخت آتیاں درستی راستی کرفنگ کن تعلیمی ادارہ غاتیٹی ہندا وڑ انا مثبت و مسختی سرجز آتا بست وبند ءِ برجا تخنگک۔