اسلامی ملک آتا نیام اٹ اقتصادی کمکاری نا شون تننگ المی ءِ،جام کمال خان

اسلام آباد، بنجائی واپار وزیرِ جام کمال خان اسلامی ملک آتا نیام اٹی اقتصادی کمکاری‘ واپاری شریداری و زرکاری نا شون تننگ آ زور شاغسا پارینے کہ مسلمان ملک آتے جہانی واپاری ٹی تینا گچین کڑد ءِ ودفنگ کن تین پہ تینی کمکاری، پوسکنوڑ واپاری مالیاتی آسراتی و کاروباری رابطہ غاتے پین سوگو جوڑ کروئی تمک۔ وخت اس کہ اسلامی ملک آتا نیام اٹ سوگو اقتصادی کمکاری بیرہ برآمد آتے ٹی ودکی نا سوب جوڑ مننگ کپک بلکہ جہانی زرگزران اٹی اوفتا اجتماعی حیثیت ءِ ہم سوگو کننگ کیک۔ دا خیال آتا درشانی ءِ او ترکیہ نا نائب صدر جودت یلماز نا کماشی ٹی اسلامی کمکار تنظیم (او آئی سی) نا اقتصادی و واپاریکمکاری نا قائمہ کمیٹی نا 42 می دیوان آن تران کرسا کرے، ہراٹی او پاکستان نا کنڈ آن اقتصادی کمکاری، واپاری آسراتی و برآمدآتا شون تننگ کن کروک گام گیج آتیا ہیت کرے‘ بنجائی وزیرِ واپار پارے کہ اسلامی ملک آتے برآمد اٹی ودکی کن پوسکنوڑ‘ گچین و اڑزان واپاری مالیاتی آسراتی تے شون تروئی مریک‘ خاص وڑ اٹ چنکا و نیامی کہول انا کاروباری ادارہ غاتے آسان مالیاتی آسراتی و جہانی منڈی تسکان رسینگ گیگ فراوان کننگ وخت انا اہم ءُ گرج اسےِ تاکہ او جہانی واپاری ٹی گچین وڑ اٹ بشخ ہلنگ کیر۔ جام کمال خان معلومدار کرے کہ پاکستان برآمد آتا شون تننگ و واپاری گڑتی غاتیٹی کمتی کن ایگزم بینک ءِ فعال کرینے، ہرا برآمد کروک آتے وام تا انشورنس، مالی ضمانت و ری فنانسنگ تون اوار پین آسراتی فراوان کننگ اٹی ءِ۔ پاکستان برآمد کروک آتیکن رعایتی مالیاتی آسراتی تیٹی ہم نمان ودکی کرینے۔ او پارے کہ برآمدی وام تا نظام ءِ ڈیجیٹل جوڑ کننگنگ اٹی ءِ تاکہ کاروباری ادارہ غاتوخت آ و دمدستی مالی کمک فراوان کننگ مرے۔ پاکستان اسلامی اصول آتیا تالان مالیاتی نظام ءِ ہم وسعت تننگ اٹی ءِ، ہراٹی مرابحہ، سلم و اجارہ کون آ آسراتیک اوار ءُ۔