گچین کاری اصلاحات کمیٹی ،پیپلز پارٹی نا کنڈ آن سینٹ آن تینا مسہ باسک انا پن کمیٹی کن پک

اسلام آباد، پاکستان پیپلز پارٹی گچین کاری اصلاحات تون تعلقدار پارلیمانی کمیٹی ٹی سینٹ نا نمائندگی کن تینا مسہ باسک آتا پن تے پک کرینے۔ حوالی نا رد اٹ اٹ پارٹی سینیٹر فاروق ایچ نائیک، سینیٹر ضمیر گھمرو و سینیٹر شہادت اعوان نا پن تے کمیٹی کن تسنے‘ گچین کاری اصلاحات کن 30 باسکی پارلیمانی کمیٹی نا ٹہیفنگ نا منظوری قومی اسمبلی آن مہالو آن دوئی کننگاسس۔ کمیٹی ٹی قومی اسمبلی نا 20 وخت اس کہ سینیٹ نا 10 باسک اوار مریرہ‘ جتا سیاسی جماعت آتے ہڑتوم آ ایوان تیٹی اوفتا کچ انا حساب اٹ نمائندگی تننگک۔ حوالی نارد اٹ گچین کاری اصلاحات تون تعلقدار پارلیمانی کمیٹی نا جوڑ کننگ نا قرارداد ءِ پاکستان پیپلز پارٹی نا چیئرمین بلاول بھٹو زرداری نا سلہ غا منظور کننگاسس۔ پیپلز پارٹی شفاف، آجو و بے کنڈ ہلوک گچین کاری تا اڈ تننگ کن حکومت و اپوزیشن ءِ اسیجائی وڑ اٹ اصلاحاتی سلاہ تننگ آ زور شاغانے۔دا رد اٹ پیپلز پارٹی نا ڈل اپوزیشن راہشون تتون اوڑدہی ہم کرے و اوفتے گچین کاری اصلاحات کمیٹی ٹی بشخ ہلنگ نا سلہ خلک تاکہ گچین کاری نظام اٹی گچینی کن کل سیاسی جماعت آتا سلابت اٹ سلاہ تے تیار کننگ مرے۔ بنجائی وزیر پارلیمانی باندات طارق فضل چوہدری اسپیکر قومی اسمبلی نا پارت آ پیپلز پارٹی و متحدہ قومی موومنٹ آن کمیٹی کن پن خواہسوسس۔ پیپلز پارٹی ءِ قومی اسمبلی نا کنڈ آن پنچ نشست رسینگ نا گمان ءِ وخت اس کہ سینٹ اٹی ہم پارٹی تینا نمائندگی کن مسہ پن تسنے۔ پارلیمانی کمیٹی گچین کاری نظام اٹی اصلاحات نا بابت جتا جتا سلاہ تے ترتیب ایتک ہرافتے اوکان گڈ منظوری کن پارلیمان اٹی پیش کننگک۔