کشاری کٹیا غا ٹیکس ہلنگ نا گام گیج آتیٹی پین ترندی اتنگے،محمد حسیب شجاع

لورالائی، ڈپٹی کمشنر لورالائی کیپٹن (ر) محمد حسیب شجاع نا کماشی ٹی کشاری کٹیا غا ٹیکس ہلنگ و محکمہ مال نا انتظامی باندات تون تعلقدار 21می جاچ دیوان ڈپٹی کمشنر آفس لورالائی ٹی اڈ ہلک۔ دیوان اٹی کشاری کٹیا غا خلوک خراج نا ہلنگ‘ سرکاری وام تا ریکوری، پدسلوک ریونیو مقدمہ، انتقال، ڈغار نا ریکارڈ نا پک کننگ و درستی، سرکاری ڈغار نا رکھ و محکمہ مال انا جم کارکڑد نا جم جاچ ءِ ہلنگا۔ تعلقدار افسرآک دیوان ءِ کیہی باندات آتیا پیشرفت و ساڑی حالیت تیاں معلومدار کریر۔ ڈپٹی کمشنر کیپٹن (ر) محمد حسیب شجاع تعلقدار افسر آتے پارت کرے کہ کشاری کٹیا غا خراج ہلنگ نا عمل اٹی پین ترندی اتنگے و پک کروک ہدف نا دوئی کننگ ءِ امر کہ مرے پک کننگے۔ او سلوک سرکاری وام تا ہلنگ کن گچین و عملی گام گیج کننگ آ ہم زور شاغا۔ او انتقال نا عمل اٹی شفافیت، ڈغار نا ریکارڈ نا درستی و پدسلوک باندات آتے پک وخت اٹ سر تننگ نا پارت کرسا پارے کہ الس ءِ محکمہ مال تون تعلقدار خذمت آتا وخت آ فراوانی ءِ پک کننگے۔ ڈپٹی کمشنر ہر پنج شنبے آ اڈ ہلوک ریونیو کچہری ءِ پین جوان کننگ نا پارت کرے و پارے کہ السی غاو و متکن آ ریونیو مقدمہ غاتے اولیتی بنداو آ ایسر کننگے تاکہ الس ءِ دمدستی ریلیف و انصاف نا فراوانی پک کننگ مرے۔ دیوان اٹی سرکاری ڈغار آ ناروا کوزہ غاتا توننگ‘ سرکاری ڈغار تا رکھ، ڈغار تون تعلقدار جھیڑہ غاتا وخت آ ایسری، محکمہ مال انا فیلڈ اسٹاف نا گچین چاروکی و ریونیو ریکارڈ نا شفافیت ءِ ہم پک کننگ آ زور شاغنگا۔ ڈپٹی کمشنر پیدوار کرے کہ محکمہ مال انا باندات آتے ٹی ڈیوالئی، سٹی تل ول‘ وڈی خوری و ہچ وڑ انا بے ضابطگی ءِ اسُل سگنگپک۔ کل افسر و کارندہ غاک تینا زمواری تے ایمانداری، شفافیت و کسبی وڑ و ڈول اٹ سرایتر و السی ویل آتا ایسری ٹی ہر وڑا نا ڈیوالئی آن تینے بچفر۔