پبلک یونیورسٹی تیٹی تعلیمی آب اکن جامع ءُ سُج پام اس ٹہیفوئی تمک،گورنر بلوچستان جعفرخان مندوخیل

کوئٹہ (خ ن) گورنر بلوچستان جعفرخان مندوخیل بلوچستان یونیورسٹی آف انجینئرنگ اینڈ ٹیکنالوجی خضدار نا مسٹمیکو سینٹ دیوان نا کماشی ءِ کرسا پارے کہ صوبہ ٹی پروفیسر و پی ایچ ڈی اسکالر آتا آخبتی تعیناتی آ رکھ انا سوب آن اینو اسکان 100 آن زیات اسکالر صوبہ ءِ السا ہنانو۔ صوبہ نا کل پبلک سیکٹر یونیورسٹی تیٹی تعلیمی آب و گچین تعلیمی چاگڑد ءِ پک کننگ کن ساڑی پی ایچ ڈی اسکالر و سینئر پروفیسر آتے برجا تخنگ و پوسکن آ پروفیسر و ریسرچر آتا چکار ءِ چکنگ نا مسخت کن اسہ جامع و است چکوک حکمت عملی اس ٹہیفوئی تمک تاکہ برین ڈرین نا وخت آ تدارک کننگ مرے۔ برین ڈرینج نا توننگ و بڑزکو تعلیمی ادارہ غاتیٹی علمی و پٹ وپولی لائخی تا شون تننگ کن گچین گام گیج المی ءُ۔ داڑان کل یونیورسٹی تا کارکڑد گچین مریک و طالب علم آتے پوسکنوڑ علم و پٹ وپول نا چکار کننگ اٹ کمک رسینگک۔ گورنر وائس چانسلر پروفیسر مقصود احمد و اونا مچ آ ٹیم انا کوشست آتا ستاءِ کرسا پارے کہ او خراجِ تحسین نا حقدار ءِ ولے بڑزکو تعلیم نا بشخ اٹی داسکان بھاز کاریم کننگ سلوک ءِ۔ سینٹ نا مسٹمیکو دیوان اٹی بلوچستان ہائی کورٹ نا جسٹس نجم الدین مینگل، قائد حزبِ اختلاف میر یونس عزیز زہری، صوبائی وزیر تعلیم راحیلہ حمید خان درانی، سیکرٹری ہائر ایجوکیشن ہاشم خان غلزئی، وائس چانسلر پروفیسر مقصود احمد، پرو وائس چانسلر پروفیسر ڈاکٹر مشتاق احمد شاہ، رجسٹرار انجینئر لیاقت لہڑی و سینٹ نا ایلو باسک آک بشخ ہلکر۔ او پارے کہ مستین نا ردینک آتے دوارہ تننگ نا جاگہ غا صوبہ ٹی پوسکن یونیورسٹی و کیمپس جوڑ کننگ کن کس انا استخواہی تا جاگہ غا ہندی گرج و ڈغاری راستی تا بنداو آ عمل کننگے۔ وخت انا خواست دادے کہ ساڑی کیمپس آتا فائدہ نا جاچ ءِ ہلسا اوفتے برجا تخنگ، اوار کننگ یا چٹفنگ نا بابت پالیسی ساز فیصلہ کننگے۔ گورنر بلوچستان نشاندہی کرے کہ منہ پوسکنوڑ بشخ آتیٹی سینئر فیکلٹی باسک آتا بھلو کاختی اسے وِخت اس کہ منہ روایتی بشخ آتیٹی طالب علم آتا حساب اٹ اسٹاف نا کچ زیات ءِ۔ او دا بے بریبری ءِ مر کننگ و انسانی وسیلہ نا گچین ڈٹ بندی نا گرج آ زور شاغا۔ او پارے کہ بڑزکو تعلیم نا آب ءِ گچین کننگ کن گچین پالیسی سازی، دوئی وسیلہ غاتا گچین کاریم اٹ اتنگ و علمی و پٹ وپولی آب اٹ پدریسہ گچینی المی ءِ۔ دیوان اٹ سینٹ باسک آتا سلاہ غا جم سجفنگ آن پد یونیورسٹی نا تعلیمی و انتظامی کارکڑد ءِ گچین جوڑ کننگ کن کیہی اہم فیصلہ کننگا۔ بلوچستان یونیورسٹی آف انجینئرنگ اینڈ ٹیکنالوجی خضدار نا مسٹمیکو سینٹ دیوان نا اخیر اٹ سینٹ باسک آتیٹی یاتگاری شیلڈ بشخ و پانٹ کننگا۔