جنگ توننگ کن گیند امریکہ نا کورٹ اٹی ءِ، باقر قالیباف

تہران، ایرانی پارلیمنٹ نا اسپیکر محمد باقر قالیباف پارینے کہ ایران دشمن نا دھڑکو و عسکری کارروائی تا مون آ سلہہ بٹپک و ملک دا وخت آ دفاعی تیاری نا بڑزکو کہول آ ساڑی ءِ۔ پارلیمان نا دیوان آن تران کرسا باقر قالیباف پارے کہ ایران و امریکہ نا نیام اٹی ودوک آ چک وتاڑ نا وخت آ جنگ ءِ توننگ نا زمواری داسہ واشنگٹن نا دوٹی ءِ‘ او پارے کہ ڈیہہ انا ملک آتے سما مرے کہ اسلامی جمہوریہ ایران ہر وڑ اٹ ہور ءِ ٹریگر آ تخسا جنگ اکن سنبرینگوک ءِ، ہندا وڑ او امریکی فریق ءِ اسہ فیصلہ ئی و پک ءُ ورندی اس ہم تسنے، داسہ جنگ ءِ توننگ کن گیند امریکہ نا کورٹ اٹی ءِ۔ اسپیکر ایرانی پارلیمنٹ پارے کہ ایران میدانِ عمل و عسکری پڑ آ دفاعی تیاری نا بڑزکو کہول آٹےِ و اگہ واشنگٹن دوارہ اسٹریٹجک ردینک اس کرے تو اودے اسہ پوسکن ءُ جنگی ڈیک اسے تون مون تروئی تمک۔ ایلو کنڈآ بڑزکو ایرانی کمامدار خبر ایجنسی تون ہیت وگپ کرسا پارے کہ ایران و امریکہ جنگ انا چٹفنگ کن معاہدہ اس اسکان سرمننگ داسکان بھاز مُر ءِ‘ او پارے کہ ایران امریکہ نا حد آن زیات خواست آتے امنا کپک، امریکہ آبنائے ہرمز ءِ ملفنگ خواہک تو اودے ایران نا شڑت آتے پورو کروئی تمک، ایران نا شڑت آتے پورو کننگ آن پد ایٹمی مذاکرات بنا مننگ کیک۔