پاکستان و سعودی عرب نا میڈیا، دودوربیدہ و السی رابطہ غاتا بشخ آتیٹی کمکاری ءِ ودفنگ آ امنا

اسلام آباد/ پاکستان و سعودی عرب حوالکاری، شینکاری، میڈیا، دودوربیدہ و السی رابطہ غاتا بشخ آتیٹی کمکاری ءِ پین مونی دننگ آامنا کرینو۔ بنجائی وزیر حوالکاری و شینکاری عطاء اللہ تارڑ تون پاکستان اٹی تعینات سعودی سفیر راجع بن طامی البقمی نا اوڑدہی ٹی اسیجائی ورکنگ گروپ نا جوڑ کننگ، پاکستانی راگ آتا مون آ دننگ و ڈل آتا ہن وبرتون اوار چندی باندات آتیا گپ وتران کننگا۔ بنجائی وزیر حوالکاری سعودی عرب نا سفیر ءِ پاکستان اٹی تعیناتی آ مبارکبادی پیش کرے و اودے بخیر کرے۔ عطاء اللہ تارڑ پارے کہ پاکستان و سعودی عرب نا تعلقداری پوسکن آ بڑزی تیا سرمننگ ءُ، ہڑتوم آملک آتا نیام اٹ میڈیا، دودوربیدہ، راگ، سازوزیمل، سیل و سوات و السی رابطہ غاتا بشخ آتیٹی کمکاری نا گیشتر گمان ساڑی ءِ۔ سعودی ولی عہد شہزادہ محمد بن سلمان نا متحرک کماشی ٹی سعودی عرب نئے بیرہ زرگزرانی بلکن دودوربیدہ ئی پڑاٹی نمان بدلی و شون ہلک۔ اوپارے کہ سعودی عرب نا شار ”العلا“ ٹی سیل و سوات نا مونی دننگ و ”الدرعیہ“ نا تاریخی و دودوربیدہ ئی اہمیت ءِ پوسکن وڑاٹ تالان کننگ سعودی سرکڑدہ غاتا وژن نا نمان درورآک ءُ۔ بنجائی وزیر حوالکاری پارے کہ پاکستان و سعودی عرب نا تعلقداریک کیہی چین تیا تالان ءُ و دا تعلقداری بیرہ سفارتی یا سیاسی اف بلکن تاریخی، مذہبی و السی کہول آ سوگو بنداو تخک۔ بنجائی وزیر ہڑتوم آ ملک آتا نیام اٹ دودوربیدہ ئی کمکاری ءِ مون آ دننگ کن اسیجائی ڈٹ آتیاکاریم کننگ نا گرج آ زور شاغا۔ عطاء اللہ تارڑ سعودی عرب اٹی رہینگوک پاکستانی شاری فرمان علی نا ذکر ءِ کرسا پارے کہ او ہڑتوم آملک آتا الس نا نیام اٹ مہرومریبت و ایلمی نا روشنا درور جوڑکرے۔ فرمان علی 2009ء ٹی جدہ ٹی نوکاپ اٹی چندی بندغ آتا جان تے بچفسا تینا جان ءِ قربان کریسس۔ اوڑدہی ٹی پاکستانی راگ آتے سعودی عرب اٹی درستی راستی کرفنگ نا گرج آ زور شاغنگا۔ بنجائی وزیر حوالکاری پارے کہ پاکستانی راگ آک خاہوتی قدر، دے ٹکی روایت و اسلامی دودوربیدہ نا درشانی ءِ کیرہ۔ او ہڑتوم آملک آتا نیام اٹ ادیب، شاعر، فنکار، موسیقار، میڈیانمائندہ و ڈیجیٹل مواد تخلیق کروک آتا ڈل آتا ہن و بر تا سلاہ ہم تس۔ اوپارے کہ پاکستان سیل و سوات نا بابت بے کچ قدرتی حسن و تاریخی ہند تخوک ملک اسے۔ بنجائی وزیر حوالکاری سعودی میڈیا نمائندہ، سیل وسوات و ڈیجیٹل انفلوئنسر آتے پاکستان نا چندی سیل و سواتی ہند آتا دورہ ءِ کننگ نا سلہ خلک۔ عطاء اللہ تارڑ غلط معلومداری و منفی پروپیگنڈا نا توننگ، فیکٹ چیکنگ نا نظام ءِ گچین جوڑ کننگ واسیجائی دودوربیدہ ئی قدر انا درشانی کروک آمواد آتا تیاری ٹی کمکاری نا گرج آ زور شاغا۔ او دا مسخت کن اسیجائی ورکنگ گروپ اس جوڑ کننگ نا سلاہ تس ہراٹی ہڑتوم آ کنڈآن فوکل پرسن و تکنیکی ٹیمک اوار مریر۔ بنجائی وزیر حوالکاری سعودی سفیر ءِ سوشل میڈیا انفلوئنسرآتا لائخی تیان فائدہ ہرفسا السی آگاہی و اہم حکومتی گام گیج آتا تشہیر کن کروک آ گا گیج آتیان ہم معلومدار کرے۔ اوپارے کہ وزیراعظم فیول ریلیف اسکیم نا بابت جاری کروک سوشل میڈیا پوسٹ ءِ 80 لکھ آن زیات وار خننگا۔ سعودی سفیر راجع بن طامی البقمی پاکستان و سعودی عرب نا نیام اٹ سوگو ایلمی تعلقداری، تین پہ تینی پت، شرف و سیاسی و عسکری کمکاری ءِ گمرنا قابل گوندا۔ اوہڑتوم آ ملک آتا نیام اٹ دودوربیدہ ئی دود، فن، ادب و میڈیا نا بشخ آتیٹی کمکاری ءِ پین مونی دننگ نا گرج آ زور شاغا۔