وزارت خزانہ،جہانی زرگزرانی شونداری نا کچ 2027اٹی 3.4درسد مننگ نا گمان

اسلام آباد، جہانی زرگزران اٹی ودکی وپاکستان نا اہم برآمدی منڈی تیٹی خواست انا سوگو حالیت آتیان ملک ءِ گڑاو خذمت آتا برآمد آتا گمان آتے سیبو ملنگ نا اومیت ءِ،ولے جہانی منڈی ٹی خام تیل، قدرتی گیس، پام آئل او کھد آتا نہاد آتیٹی ودکی آن درآمدی خڑچ وملکی زرگزران آ زور ودنگ کیک۔ دا ہیت ءِ وزارت خزانہ نا کنڈآن جاری کروک تُوئی اقتصادی اپ ڈیٹ اٹی پاننگانے۔ رپورٹ اٹی آئی ایم ایف نا ورلڈ اکنامک آؤٹ لک رپورٹ نا رد اٹ پاننگانے کہ جہانی زرگزرانی شونداری نا کچ 2026اٹی 3.1درسد و2027اٹی 3.4درسد مننگ نا پیش گوئی ءِ۔۔ جہانی لس کبینی نا کچ 2026اٹی 4.7درسد اسکان ودنگ آن پد 2027اٹی کم مرسا 4.1درسد مننگ نا گمان ءِ۔ رپورٹ نا رداٹ، ستمبر 2026نا زرگزرانی ٹک آک جہانی اقتصادی سرجزآتیٹی پدریسہ ودکی نا پیدواری ءِ کننگ ءُ۔ جے پی مورگن گلوبل کمپوزٹ پرچیزنگ مینیجرز انڈیکس اگست نا 53.5پوائنٹ آتیان ودسا ستمبر اٹی 54.3پوائنٹ مس ہراٹی خذمت و صنعتی بشخ آک ہڑتوم آک کڑدادا کریر۔ ہنداوڑ 17اکتوبر آ پورو مروک ہفتہ ٹی امریکہ ویکلی اکنامک انڈیکس 3.3درسد ریکارڈ کننگا، وخت اس کہ امریکہ، برطانیہ و اقتصادی کمکاری او شوندار ی نا تنظیم او ای سی ڈی نا زرگزران تاکمپوزٹ لیڈنگ انڈیکیٹرز ہم تینا مست انا کہول آ خڑک ئس۔ خزانہ وزارت نا رداٹ، پاکستان نا اہم واپاری منڈی تیٹی خواست انا سوگو حالیت آتیان ملکی برآمد آتا گمانی تے سوگوی ملنگ نا اومیتءِ، ولے جغرافیائی سیاسی بے چیٹی، جہانی واپاراٹی اڑاند وٹیکنالوجی نا بشخ اٹی زرکاری نا بارواٹ بے باور حالیت جہانی زرگزرانی وڑ تیکن اہم گڑتیءُ۔