رحمان بابا ٹرین شکست، زوال مروک آتا کچ 6 ءِ سر مس

ملتان، شیر شاہ پول انا کڑک آ شکست نا گواچی مروک رحمان بابا ایکسپریس آ ریسکیو آپریشن پورو کننگانے،خت اس کہ شکست اٹ 6 بندغ نا زوال مننگ پک مسنے‘ حوالی نا رد اٹ ٹرین بھاز تیز ئس ہرانا سوب آن کل بوگیک چَپی مسر۔ اسہ مسافر اس پارے کہ رحمان بابا ایکسپریس نا شکست سہب انا سوا 5 بجہ پیش بس، روہڑی نا خڑک آ بوگی نمبر 9 نا نٹ بولٹ درست کننگاسر۔ ایلو کنڈ آ ریسکیو کمامدار آک پارینو کہ زہمی بوگی آن پین اسہ میت اس کشنگانے ہراڑان پد زوال مروک آتا کچ 6 مسنے، وخت اس کہ ٹھپی تا کچ 30 آن زیات ءِ۔ کل میت و ٹھپی تے نشتر ہسپتال آ گدریفنگانے و ہسپتال اٹی ایمرجنسی نافذ کننگانے۔ ریسکیو کمامدار آتا رِد اٹ ٹرین شکست آن پد ریسکیو آپریشن پورو کننگانے ولے شکست آن پد یک ونیم سال انا چنکو مسڑ اس گم ءِ ہرادے پٹنگ انگ ءِ۔