بلوچستان نا 25 ہزار ورنا ءِ کسب ہیل ترسا پیشن ملک آ راہی کننگک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی نا کماشی ٹی بلوچستان ٹیکنیکل ایجوکیشن اینڈ ووکیشنل ٹریننگ اتھارٹی (بی ٹیوٹا) نا بورڈ انا یانزدہمیکو دیوان اٹی بروک آ سال اسکان صوبہ نا 25 ہزار ورنا ءِ جتاجتا بشخ آتیٹی فنی ہیلکاری فراوان کننگ نا ڈٹ منظور کننگا، وخت اس کہ 30 ہزار ورنا ءِ ہنرمند جوڑ کرسا پیشن ملک آ روزگار کن راہی کننگ نا پروگرام آ پیشرفت ءِ ترند کننگ نا فیصلہ کننگا۔ دیوان اٹی فنی تعلیم نا شون تننگ، ورنا تا کسبی لائخی تے ٹی ودکی و روزگار نا وارخواہی تا ودی کننگ کن برجا گام گیج آتا جاچ ءِ ہلنگا۔ وزیراعلیٰ بلوچستان میر سرفراز بگٹی فنی تعلیم نا واکداری کچ اٹی ودکی، ادارہ غاتا رجسٹریشن و چاروکی نا نظام ءِ جوان جوڑ کننگ کن انسٹی ٹیوٹ رجسٹریشن پورٹل نا بناءِ کرے۔ دا پورٹل نا کمک اٹ فنی ہیلکاری ادارہ غاتا رجسٹریشن و کارکڑد نا چاروکی نا نظام ءِ گچین جوڑ کننگ اٹی کمک رسینگک‘ دیوان آن تران کرسا وزیراعلیٰ میر سرفراز بگٹی پارے کہ ورنا تے روزگار نا وارخواہی فراوان کننگ کن گچین چاگڑد نا شون تننگ المی ءِ۔ فنی تعلیم و ہنرمندی نا شون تننگ ورنا تے زرگزرانی وتواجہ کننگ نا کسر آ راہی کننگ کن المی ءِ۔ او پارے کہ ورنا تے پوسکنوڑ خواست و مارکیٹ نا گرج آتا رِد اٹ فنی ہیلکاری فراوان کننگے تاکہ او ہندی و جہانی کہول آ روزگار دوئی کرسا تینا خاہوت آتا زرگزرانی حالیت آتے گچین کننگ تون اوار ملکی شونداری ٹی ہم جوان کڑد ادا کننگ کیر۔ وزیراعلیٰ تعلقدار کمامدار آتے پارت کرے کہ بروک آ سال اسکان فنی ہیلکاری پورو کروک 25 ہزار ورنا ءِ قومی و جہانی زرگزران نا بشخ جوڑ کننگ کن جم حکمت عملی اس ترتیب کننگے۔ او پارے کہ ہیلکاری پروگرام آتے روزگار نا حقی گرج آتتون ہم گرنچ کننگ المی ءِ تاکہ ورنا تے بیرہ ہیلکاری فراوان کننگ اسکان کچ اٹ تخنگ نا جاگہ غا اوفتے عملی وڑ اٹ روزگار نا وارخواہی تتون گنڈنگ مرے۔ دیوان اٹی 30 ہزار ورنا ءِ جتا جتا بشخ آتیٹی ہنرمند جوڑ کرسا پیشن ملک آ روزگار کن راہی کننگ نا پروگرام آ پیشرفت ءِ ترند کننگ آ ہم زور شاغنگا۔ وزیراعلیٰ پارے کہ ورنا تا لائخی تے ہنر اٹی بدل کرسا اوفتے ملکی و جہانی کہول آ روزگار نا لائخ جوڑ کننگ وخت انا اہم ءُ گرج اسے۔ دا مسخت کن فنی ہیلکاری ادارہ غاتا کارکڑد ءِ گچین کننگ، ہیلکاری نا آب ءِ پک کننگ و تعلقدار ادارہ غاتا نیام اٹی جوان رابطہ کاری ءِ شون تننگے۔ دیوان اٹی چیف منسٹر یوتھ اسکلز ڈویلپمنٹ پروگرام نا ہدف تا دوئی کننگ اٹی نزوری نا ہم جاچ ءِ ہلنگا۔ دیوان ءِ پاننگا کہ پروگرام آ عملدرآمد اٹی ہُرے و پک ہدف تا دوئی کننگ اٹ ڈیوالئی کروک زموار آتا برخلاف کارروائی بنا کننگانے۔ وزیراعلیٰ پارت کرے کہ فنی ہیلکاری نا ڈٹ آتیا عملدرآمد ءِ ترند کننگے و پک ہدف تا دوئی کننگ کن تعلقدار ادارہ غاتا کارکڑد نا مدامگی اٹ چاروکی کننگے۔ وزیراعلیٰ میر سرفراز بگٹی پارے کہ بلوچستان نا ورنا تیٹی بھاز لائخی ارے ہرافتے سہی کنڈ آ کاریم اٹ اتسا صوبہ نا زرگزرانی شونداری و شونہالی کن جوان کڑد ادا کننگ مریک۔ او دا ہیت آ زور شاغا کہ فنی تعلیم و کسبی ہیلکاری نا پروگرام تے بھرمی جوڑ کننگے تاکہ ورناتے باوقار روزگار نا وارخواہی دوئی مرے‘ اوفتا زرگزرانی وتواجہی ٹی ودکی مرے و او قومی و جہانی زرگزران نا فعال بشخ مریر۔