کشارگر تے خولم نا جوان نہاد و الس ءِ اڑزان نُت فراوان کننگک،وزیراعظم شہباز شریف نا پڑو

اسلام آباد،وزیراعظم محمد شہباز شریف پارینے کہ خولم نا نہاد نا پڑو صوبہ غاتتون سلابت پورو مننگ آن پد زُوت کننگک، حکومت نا کوشست ءِ کہ کشارگر آتے اوفتا خواری نا جوان بدل رسینگے و صارف آتے اڑزان خولم دوئی مرے۔ او پیدوار کرے کہ خولم نا کوڑی کروک آتتون ہچ وڑ انا رعایت کننگپک و خولم نا دسنگ آن مست اونا جوان نہاد نا پک کننگ المی ءِ تاکہ کشارگر آک فصل نا دسنگ تون تعلقدار گچین فیصلہ کننگ کیر۔ وزیراعظم محمد شہباز شریف نا کماشی ٹی اسلام آباد اٹی قومی کشاری و غذائی رکھ کونسل نا اولیکو دیوان اڈ ہلک، ہراٹی ملکی کشت وکشار نا شونداری، کشارگر آتے آسراتی تا فراوانی، غذائی رکھ، خولم نا نہاد نا پک کننگ و کشاری و ساہدار تا گڑاتا برآمداتی ودفنگ کن جتا جتا گام گیج آتا جاچ ءِ ہلنگا۔ دیوان آن تران کرسا وزیراعظم پارے کہ کشت وکشار ملکی زرگزران نا مُخ ءِ و دا بشخ پاکستان ءِ چنکو وخت اسے ٹی زرگزرانی شونداری نا کسر آ دننگ نا پورو بود تخک۔ او دا ارادگی نا درشانی ءِ کرے کہ بنجائی حکومت کشاری بشخ انا گچینی و کشارگر تا شونہالی کن صوبائی حکومت آتے ہر وڑ انا کمک فراوان کیک۔ وزیراعظم پارے کہ کشارگر آتے کم خڑچ آ کھد، آب اتو تخم، پوسکنوڑ کشاری مشینری و دیر انا گچین کاریم اٹ اتنگ کن المی ازباب و تکنیکی آسراتی تا فراوانی حکومت نا اولیت آتیٹی اوار ءِ۔ خاص وڑ اٹ چنکا و نیامی کہول انا کشارگر آتے اوفتا فصل تا جوان نہاد رسیفنگ المی ءِ تاکہ اوفتا کٹیا ٹی ودکی مرے و کشاری پیداوار ءِ شون رسینگے۔ خولم نا نہاد نا بابت وزیراعظم پارے کہ حکومت اسہ ہندن ءُ بریبر فیصلہ اس کننگ خواہک ہراڑان کشارگر آتے اوفتا خواری نا پورو بدل رسینگے و لس صارف آتیا ہم ودکی مالی باریم تمپ۔ او پارے کہ ملکی گرج آتے پورو کننگ کن خولم بھلو کچ اسے اٹ ساڑی ءِ، ولے اونا کوڑی کاری نا توننگ و مارکیٹ اٹی جوان فراوانی ءِ پک کننگ المی ءِ۔ خولم نا نہاد نا پک کننگ کن صوبہ غاتتون سلابت کننگک و دا عمل پورو مننگ تون نہاد نا پڑو کننگک۔ وزیراعظم پنجاب و سندھ انا صوبائی حکومت تا کنڈ آن کشارگر تا شونداری کن کروک گام گیج آتا ستاءِ کرسا پارے کہ وزیراعلیٰ پنجاب مریم نواز شریف کشارگر آتا آسراتی و آسودہی‘ آب اٹو کشت وکشار‘ جھینگا تا افزائش و کسان کارڈ نا کمک اٹ دراست مالی کمک نا فراوانی کن گام گیج کننگ اٹی ءِ۔ او سندھ حکومت نا کوشست آتا پارے کہ وزیراعلیٰ سندھ ہم کشارگر تا شونداری و اوفتے آسراتی تا فراوانی کن پورو خواری کننگ اٹی ءِ۔ وزیراعظم ساہدار توننگ نا بشخ انا اہمیت ءِ پیدوار کرسا پارے کہ پاکستان اٹی دا بشخ انا کمک اٹ ملکی برآمد آتیٹی نمان ودکی کننگ نا بھلو وارخواہی ارےِ۔ حکومت پاکستانی حلال سو انا برآمد آتے ودفنگ کن ہم گام گیج کننگ اٹی ءِ، ہراڑان زرکوڑی نا دوئی و ملکی زرگزران ءِ سوگو کننگ اٹی کمک رسینگ کیک۔ دیوان اٹ وزیراعلیٰ پنجاب و وزیر کنشت سندھ تینا تینا صوبہ غاتیٹی کشارگر تا شونداری، کشاری پیداوار اٹی ودکی و کشارگر آتے آسراتی تا فراوانی کن کروک گام گیج آتیان معلومدار کریر۔ بلوچستان، خیبرپختونخوا، آزاد جموں و کشمیر و گلگت بلتستان اٹی کشت وکشار نا شونداری نا بابت ہم شریدار آتے بریفنگ تننگا۔ دیوان اٹی نائب وزیراعظم و وزیر خارجہ سینیٹر محمد اسحاق ڈار، بنجائی وزیر رانا تنویر حسین، ڈاکٹر مصدق ملک، جام کمال خان، احد خان چیمہ، احسن اقبال، عطاء اللہ تارڑ، خالد حسین مگسی و میاں معین وٹو، سلاہکار رانا ثناء اللہ و ہارون اختر، وزیراعلیٰ پنجاب مریم نواز شریف، وزیر کشت وکشار سندھ مخدوم محبوب الزمان و تعلقدار بڑزکو کمامدار آک بشخ ہلکر۔ وزیراعظم دا وخت آ دا ارادگی نا درشانی ءِ کرے کہ بنجا و صوبہ غاتا نیام اٹی جوان رابطہ و تین پہ تینی سلاہ نا کمک اٹ کشاری بشخ ءِ سوگو جوڑ کننگک، کشارگر آتا مشکل آتے کم کننگک و ملک اٹی غذائی رکھ اتون اوار کشاری برآمد آتے ٹی ودکی کن عملی گام گیج کننگک۔