کانود آن چَپ مائیگریشن نا توننگ کن جہانی کہول آ کاریم کروئی تمک،بنجائی وزیر داخلہ

اسلام آباد، بنجائی وزیر داخلہ محسن نقوی تون یورپی یونین نا کمشنر داخلی باندات و مائیگریشن میگنس برنر نا اہم اوڑدہی مس، ہراٹی ہڑتوم آ کنڈآتا تعلقداری تون اوار ڈل آتا کہول آ سرجمی اٹ مذاکرات کننگا۔ وزارت داخلہ نا رداٹ اوڑدہی ٹی کانودی امیگریشن نا مونی دننگ، بارڈر مینجمنٹ و کانود آن چَپ مائیگریشن نا توننگ نا بابت اہم باندات آ گپ وتران کننگا۔ یورپی کمشنر میگنس برنر کانود آن چَپ مائیگریشن نا برخلاف پاکستان نا کنڈآن ہرفوک گام گیج آتا ستا ءِ کرسا پارے کہ پاکستان نا پبی گام گیج آتا سوب آن یورپ نا کنڈآ کانود آن چَپ مائیگریشن اٹی 64 درسد اسکان نمان کمتی مسنے ہرا ستاکڑزک۔ او کچ اٹنگا وسیلہ غاتیان پد ہم ایف آئی اے (FIA) نا کسبی کارکڑد نا ستا ءِ کرے و پیدوار کرے کہ کانود آن چَپ مائیگریشن اٹی کمتی آن پاکستانی تیکن کانودی مائیگریشن نا پوسکن ءُ کسر ملنگک۔ او دا بشخ اٹ پاکستان تون پورو کمکاری ءِ برجاتخنگ نا باوری ہم کرفے۔ دا وخت آ بنجائی وزیر داخلہ محسن نقوی پارے کہ پاکستان اٹی کانود آن چَپ مائیگریشن نا برخلاف ”زیرو ٹالرنس” پالیسی نافذالعمل ءِ۔ 64 درسد کمتی آن پد داسہ ننا بروک آ ہدف 100 درسد چٹفنگ ءِ۔ او زور شاغا کہ کانود آن چَپ کانودی مائیگریشن اسہ سنجیدہ جہانی ویل اسے و اونا پورو توننگ کن پاکستان و یورپی یونین ءِ تین پہ تینی شریداری اٹ کاریم کروئی مریک۔ مذاکرات نا وخت آ ہڑتوم آ راہشونک بارڈر سیکورٹی ءِ گچین جوڑ کننگ، کانودی مائیگریشن نا دنگ ءِ ودفنگ و پاکستانی کسبکار ہیومن ریسورس کن یورپ اٹ وارخواہی ودی کننگ آ امنا کریر۔ داکان بیدس کانود آن چَپ مائیگریشن نا چٹفنگ کن یورپی یونین نا ”ایسٹرن کوریڈور انیشی ایٹو” آ اواری اٹ کاریم کننگ و پاکستان کوسٹ گارڈز انا کسبی لائخی تیٹی ودکی کن تین پہ تینی کمکاری ءِ مون آ دننگ نا فیصلہ کننگا۔ دا وخت آ سیکرٹری داخلہ، اسپیشل و ایڈیشنل سیکرٹری داخلہ، ڈی جی ایف آئی اے، آئی جی فیڈرل کانسٹیبلری، ڈی جی این سی سی آئی اے، ڈی جی پاسپورٹ، چیف کمشنر اسلام آباد و ایلو بڑزکو کمامدار آک ہم ساڑی ئسر۔