خیبر پختونخوا و بلوچستان نا حالیت و حکومتی کڑدار ءِ بیٹ تننگ مفک،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ خیبرپختونخوا و بلوچستان نا حالیت و ہڑتوم آ صوبائی حکومت آتا کڑدار ءِ ہچ وڑ اٹ بیٹ تننگ مفک‘ آئین جوڑ کروک آ سرکڑدہ غاک حالیت آتے مون آ تخسا آئین اٹی تعلقدار آرٹیکل تے اوار کریسر، بنجا آئین نا رد اٹ گام ہرفینے و ہچ ءُ غیر آئینی کاریم اس کتنے، نن دا گام انا مخ تفی ءِ کینہ۔ دا خیال آتا درشانی ءِ او دوشنبے نا دے بلوچستان اسمبلی نا دیوان اٹی خیبرپختونخوا نا حالیت آتیا تینا خیال آتا درشانی ءِ کرسا کرے۔ میر سرفراز بگٹی پارے کہ بلوچستان و خیبرپختونخوا نا حالیت آتے بیٹ تننگ انگ ءِ ولے ہڑتوم آ صوبہ غاتیٹی دہشت گردی تون مون تننگ و حکومتی زمواری تا سرتننگ نا بابت پیدوار فرق ارے‘ مچ آ پاکستان ءِ سما مرے کہ بلوچستان و خیبرپختونخوا نا حالیت و ہڑتوم آ صوبائی حکومت آتا کڑدار ءِ ہچ گہس بیٹ تننگ مفک۔ وزیراعلیٰ پارے کہ خیبرپختونخوا ٹی ایمرجنسی نا گام بیرہ امن وایمنی نا بنداو آ اف بلکہ حکومتی کڑدار ادا کپننگ نا رد اٹ ہرفنگانے۔ خیبرپختونخوا ٹی سیکورٹی کن جتا کروک فنڈ آن سوشل میڈیا ٹیم ٹہیفنگا، وخت اس کہ دہشت گردی تون مون تننگ کن سیکیرٹی ادارہ غاتے حکومتی کمک، گچین کانود سازی و بیانیہ جوڑ کننگ اٹ کمکاری فراوان کننگ المی مریک۔ میر سرفراز بگٹی پارے کہ دہشت گردی نا برخلاف جنگ اٹی حکومت ءِ تینا زمواری ءِ امنا کروئی تمک۔ بلوچستان اٹی حکومت دا جنگ ءِ تینا جنگ سرپند مرسا اونا زمواری ءِ امنا کیک، وخت اس کہ خیبرپختونخوا ٹی دن کننگپک۔ او پارے کہ جہانی کہول آ جوڑ مروک چاگڑد اٹی بنجا غا جلہو کروک آ ہیت آتے کننگاکہ‘ ہرافک ساڑی حالیت آتیٹی سجفنگ نا وڑ اٹی ءُ۔ وزیراعلیٰ بلوچستان پارے کہ کل سیاسی جماعت آتا راہشون و کارندہ غاک دہشت گردی ٹی شست مسر و شہید مسر۔ او پارے کہ اسہ مخصوص جماعت اسے آ اینو اسکان اسہ ٹپاسکی ہم ترختنے و دا حالیت آ سوج چست کرسا پارے کہ اللہ کَپ کہ کس آ جلہو مرے، ولے دا سوج تینا جاگہ غا ساڑی ءِ کہ اوفتتون ہرا جادو نا چھڑی ءِ۔ میر سرفراز بگٹی پارے کہ او تدوک آ دے سوئی نا دورہ ءِ کرے تو کنے آ دستی بمب و کریکر دھماکہ مس۔ اگہ بلوچستان حکومت دہشت گردی نا برخلاف دا جنگ ءِ تینا جنگ سرپند متوکہ تو حالیت آک پین مسرہ ولے صوبائی حکومت دا چیلنج ءِ تینا زمواری سرپند مرسا اوڑتون مون تننگ اٹی ءِ‘ وزیراعلیٰ پارے کہ بینظیر بھٹو، بشیر بلور و میاں افتخار حسین نا مار انا خونی تے پدی اتنگ نا ہیت آتے دیر کنگن ئس‘ داہم اسہ اہم ءُ سوج اسے۔ او پارے کہ بلوچستان اسمبلی نا کل باسک آک دہشت گردی نا برخلاف ءُ و سیکورٹی فورس آتتون ہم کوپہ سلوک ءُ۔