کیمرہ غاتیا تالان پیداوار نا خود کار چاروکی نا کسر اٹ اڑاند آتے اینک کننگے،وزیرِ اعظم شہباز شریف

اسلام آباد، وزیر اعظم محمد شہباز شریف پارینے کہ کیمرہ غاتیا تالان پیداوار نا خود کار چاروکی نا نظام ءِ خلنگ اٹی اڑاند آتے اینک کننگے۔ صارف آن ٹیکس دوئی کرسا تینا جیب آتیٹی شاغوک کاروبار آک ہچ ءُ رعایت اسے نا حقدار افس۔ وزیرِ اعظم نا کماشی ٹی ایف بی آر نا اصلاحات آ جاچ دیوان دوشنبے نا دے اسلام آباد اٹی اڈ ہلک۔ وزیراعظم محمد شہباز شریف پیداواری سیکٹر نا کل بشخ آتیٹی سیلز ٹیکس کن پیداوار نا چاروکی ءِ برجا سال انا اخیر اسکان پورو کننگ نا پارت کرسا پیداواری بشخ انا جم جاچ ہلسا واکداری نا حساب پیش کروک آ ٹیم انا ستاءِ کرے۔ وزیراعظم پارے کہ فیس لیس نظام نا رد اٹ کیمرہ غاتا کمک اٹ پیداوار نا چاروکی ءِ گچین جوڑ کننگ انگ ءِ۔ کیمرہ غاتیا تالان پیداوار نا خود کار چاروکی نا نظام خلنگ اٹی اڑاند آتے اینک کننگے۔ صارف آن ٹیکس دوئی کرسا تینا جیب آتیٹی شاغوک کاروبار آک ہچ رعایت نا حقدار افس، پیداواری بشخ اٹی ہرا کاروبار منشائی وڑ اٹ چاروکی نا نظام نصب کننگ ءُ اوفتے شرف ایتنہ‘ ٹیکس انا پورو واکداری نا دوئی کننگ کن کل المی گام گیج کننگک۔ وزیرِاعظم سیمنٹ نا بشخ اٹی پیداوار نا چاروکی نا نظام نا آڈٹ رپورٹ نا ستاءِ کرسا پارے کہ پیداوار نا چاروکی نا نظام نا گچینی نا جاچ ءِ ہلنگ کن وزارت انفارمیشن ٹیکنالوجی سلوک بشخ آتیٹی ہم اونا آڈٹ ءِ کرے۔ ٹیکس انا پورو واکداری نا رِد اٹ ٹیکس انا ہلنگ الس نا سہی معنہ اٹ خذمت ءِ۔ ٹیکس انا واکداری و ہلنگ آ ٹیکس انا نیام اٹی فرق آ جم رپورٹ ٹہیفوک آ ایف بی آر ٹرانسفارمیشن ٹیم انا کوشست آک ستا کڑزرہ۔ ٹیم دے و نن خواری آن پد ملکی ٹیکس واکداری نا گچین جاچ پیش کرے۔ وزیرِاعظم ٹیکس واکداری رپورٹ جوڑ کرسا پیش کروک بندغ آتا خصوصی ستاءِ کرے‘ دیوان نا اخیر اٹ شیلڈ پیش کننگا۔ وزیرِ اعظم نا کماشی ٹی ایف بی آر نا اصلاحات آ جاچ دیوان دوشنبے نا دے اسلام آباد اٹی اڈ ہلک۔ دیوان ءِ پیداواری بشخ اٹی ٹیکس چاروکی نا نظام آ بریفنگ تننگا۔ دیوان ءِ پاننگا کہ بورہ‘ سرمٹ‘ تمباک، ٹائلز و کھد انا بشخ آتیٹی نظام پورو وڑ اٹ خلنگانے‘ دیوان ءِ مستی پاننگا کہ ٹیکسٹائلز، پیکیجڈ دیر، پیکیجڈ جوس و پیکیجڈ پال انا بشخ اٹی چاروکی نا نظام خلنگ انگ ءِ‘ و داڑکن ازباب آتا ہلنگ پورو مسنے۔ دیوان ءِ پاننگا کہ اسٹیل، پولٹری و ٹائر نا بشخ اٹی ازباب آتا ہلنگ 15 اکتوبر وخت اس کہ چا، اُرائی الیکٹرانکس، سل‘ کاغد و بورڈ و تیل و سی اکن 30 اکتوبر اسکان خریداری پورو کننگک۔ دا وڑ دا کل پیداواری بشخ آتیٹی چاروکی نا نظام ءِ برجا سال 31 دسمبر اسکان پورو فعال کننگک۔ دیوان ءِ پاننگا کہ ٹیکسٹائل نا بشخ اٹی ہراڑے بھاز صنعت آک چاروکی نا نظام نا خلنگ اٹی مزاحمت نا کریر ہموڑے نشاط ملز، الکرم ٹیکسٹائل، الکرم کاٹن ملز، J.K سپننگ ملز، صورتی اینٹرپرائز، انٹرلوپ لمیٹڈ، فیصل سپننگ ملز، ابراہیم فائبرز لمیٹڈ، سفیئر ٹیکسٹائلز لمیٹڈ و نشاط چونیاں حکومتی گام گیج آتیا عملدرآمد کرسا منشائی وڑ اٹ چاروکی نا نظام خلکر۔ وزیرِاعظم دا صنعت آتا دا گام انا ستاءِ کرے۔ وزیرِاعظم ءِ ٹیکس ہلنگ و ٹیکس انا واکداری نا نیام اٹی فرق آ جاچ رپورٹ ہم پیش کننگا ہراٹی ملک انا ٹیکس واکداری نا حساب پیش کننگاسس۔ دیوان ءِ پاننگا کہ تدوک آ مسہ سال اٹی حکومتی گام گیج آتا سوب آن 1.3 ٹریلین روپئی نا ودکی ٹیکس مچ کننگا ہراکہ ٹیکس ہلنگ اٹی 40 درسد ودکی ءِ۔ پیدوار کرسا دیوان ءِ پاننگا کہ دا ودکی ٹیکس انفورسمنٹ گام گیج آتا سوب آن مچ مس۔ وزیرِاعظم ایف بی آر ٹرانسفارمیشن ٹیم انا دے و نن خواری آن پد جم رپورٹ پیش کننگ آ ستاءِ کرے و شیلڈ تس۔ دیوان اٹی بنجائی وزیرک اعظم نذیر تارڑ، ڈاکٹر مصدق ملک، احد خان چیمہ، شزہ فاطمہ خواجہ، وزیرِ مملکت بلال اظہر کیانی، سلاہکار وزیرِ اعظم ہارون اختر و تعلقدار بڑزکو کمامدار آک بشخ ہلکر۔