پاکستان جی 24 نا آخبتی چیئرمین شپ کن سنبرینگوک ءِ،وزیرخزانہ محمد اورنگزیب
جہانی مالیاتی نظام اٹی اصلاحات آتے دا چیلنج آتا رداٹ مونی دننگ وخت انا گرج ءِ
Get real time updates directly on you device, subscribe now.
اسلام آباد، بنجائی وزیر خزانہ و بنگکاری محمد اورنگزیب پاکستان نا کنڈآن جی 24 نا آخبت چیئر نا حیثیت اٹ گروپ نا اجتماعی اثرو رسوخ ءِ سوگو کننگ و پدتموک زرگزران تا فائدہ غاتا مون آ دننگ کن گچین کڑد ادا کننگ نا عزم انا درشانی ءِ کرینے۔ او دا ہیت ءِ سے شنبے نادے آ بنکاک اٹی جہانی بینک گروپ و جہانی مالیاتی فنڈ انا سالانہ دیوان 2026 نا وخت آ وزیر خزانہ غاتا و بنجائی بینک آتا گورنرآتا دیوان اٹی جی 24 نا فرسٹ وائس چیئرمین نا حیثیت اٹ تران کرسا پارے۔ وزیر خزانہ تینا تران اٹی پدتموک زرگزران تے مون تروک جہانی کہول آ بشخنگ نا سوب واپار و زرکاری ٹی اڑاند، موسمیاتی بدلی تا منفی زہم تیان شونداری سرسہبی تے ملوک آ نسخان، سخت مالیاتی حالیت و مالی وسیلہ غاتا ودوک آ کمتی کون آ چیلنج و ویل آتے سرجمی اٹ مون آ تخا۔ وزیر خزانہ جی 24 نا آخبت چیئر نا حیثیت اٹ گروپ نا اجتماعی اثر ورسوخ ءِ سوگو کننگ و پدتموک زرگزران تا فائدہ غاتا مون آ دننگ کن گچین کڑد ادا کننگ نا بابت پاکستان نا ارادگی نا درشانی ءِ کرے۔ وزیر خزانہ زور شاغا کہ جہانی مالیاتی نظام اٹی اصلاحات آتے دا چیلنج آتا رداٹ مونی دننگ وخت انا گرج ءِ۔ وزیر خزانہ مشکل اصلاحات آتیا عمل کروک ہمو ملک آتے وخت آ کمک فراوان کننگ نا گرج آ ہم زور شاغا ہرا دا وڑ انا پیشن نا حالیت آتا منفی زہم تتون مون تننگ ءُ ہرافتیا اوفتا اختیار اف۔ او جہانی مالیاتی نظام اٹی شونداری ءِ بنجائی مسخت نا حیثیت اٹ بحال کننگ، بریٹن ووڈز ادارہ غاتے زیات نمائندہ و باسک ملک آتا گرج آتے کن زیات گچین جوڑ کننگ و شونداری نا مون آ دننگ آ چکار کروک جہانی مالیاتی نظام نا جوڑ کننگ ءِ جی 24 نا مسہ اولیت گوندا و دا مسخت آتا دوئی کننگ کن اسیجائی گام گیج و کوشست آتا گرج آ زور شاغا۔ نائیجیریا نا سرکڑدہ غاتا ستاءِ کرسا وزیر خزانہ زیات جامع، سوگو و شونداری آ تالان جہانی زرگزرانی نظام نا جوڑ کننگ کن باسک ملک و تعلقدار ادارہ غاتا نیام اٹ کمکاری نا اہمیت آ ہم زور شاغا۔