نیزگاری نا چٹفنگ انسانی شونداری و زرگزرانی شونہالی کن المی ءِ،احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان ءِ مدامگی و مقابلہ کروک زرگزران جوڑ کننگ کن نیزگاری نا چٹفنگ، انسانی وسیلہ غاتا شونداری و راجی ٹک آتیٹی گچینی اتنگ ءِ قومی اولیت آتیٹی سرلڑ اٹ تخوئی تمک۔ شونداری نا بھرم آتے ملک انا ہر شاری و ہر علاقہ اسکان سرکننگ و زرگزرانی وارخواہی تا انصاف نا رداٹ فراوانی ءِ پک کننگ وخت انا اہم گرج ءِ۔ جوان زرگزرانی شونداری، زرگزرانی وتواجہی و نیزگاری آن شادمانی نا کنڈ آ سفر نا سرحال آ اڈ ہلوک کانفرنس اٹ وزیراعظم محمد شہباز شریف نا نمائندگی ءِ کرسا بنجائی وزیر پارے کہ نیزگاری بیرہ کٹیانا کمتی اف بلکن تعلیم، جان جوڑی، غذائیت و عزت نا روزگار اسکان کچ اٹ رسینگ نا پن ہم ارے۔ پاکستان اٹ نیزگاری نا کچ اٹ ودکی و نزورراجی ٹک آتیاگڑتی نا درشانی ءِ کرسا او پارے کہ ملک انا مدامگی شونداری کن دا بنداوی ویل آتا گچین ایسر المی ءِ۔ احسن اقبال پارے کہ پاکستان اٹ کم و ود دونیم کروڑ چنا اسکول آتیان پیشن ءُ، وخت اس کہ چناتیٹی نشوونما نا کمتی نا کچ کم و ود 40 درسد ءِ۔ تعلیم، جان جوڑی و غذائیت نا بشخ آتیٹی گچینی آن بیدس پاکستان جہانی زرگزران اٹ گچین مقابلہ کننگ کپک۔ او بنائی چنکی نا نشوونما، آب اٹ تعلیم و انسانی وسیلہ غاتیٹی زرکاری ءِ آخبتی زرگزرانی شونداری کن بنداوی اہمیت نا سوب گوندا۔ بنجائی وزیر پارے کہ حکومت نا چکاربیرہ نیزگاری نا کچ انا جاچ ءِ ہلنگ اسکان کچ اٹ اف بلکن بندغ آتے نیزگاری آن کشسا تینا نت تیا سلفنگ نا مزل اسکان سرکننگ ننا اصل ہدف ءِ و نن دا مسخت نا دوئی کننگ کن تینا کوشست آتے پین گچین و ترند کننگ تون اوار اوار کل تعلقدار فریق آتے ہم متحرک کننگ اُن۔ بنجائی وزیر پارے کہ نیزگاری نا مدامگی چٹفنگ کن حقدار خاہوت آتے بیرہ مالی کمک یا پیداواری میرات آتے تننگ گنج اس اف، بلکن اوفتے کسب، کاروباری زرکاری‘ منڈی تسکان رسینگ و پت انا قابل زرگزرانی وڑ ہم فراوان کروئی مریک۔