موسمیاتی بدلی تون مون تننگ کن کوشست کننگ اُن، وزیراعظم

اسلام آباد، وزیراعظم محمد شہباز شریف پارینے کہ موسمیاتی بدلی تا بابت خطرہ غاتیٹی ودکی نا رداٹ دا خطرہ غاتیٹی کمتی ءِ تینا موسمیاتی و شونداری ڈٹ آتا بشخ جوڑ کننگ کن کوشست کننگ اُن۔ سے پنچ شنبے نا دے آ راجی رابطہ نا ویب سائٹ ”ایکس“ آ بیان اٹی وزیراعظم پارے کہ اینو نا احتیاط پگہ نا رکھ اکن المی ءِ، قدرتی آفت آتا خطرہ غاتیٹی کمتی ناجہانی دے انا وخت آ نن مچ آ پاکستان اٹی رکھ و قدرتی آفت آتا مقابلہ ءِ کننگ نا زیات لائخی تخوک آ کمیونٹی تا جوڑ کننگ نا ارادگی نا درشانی ءِ کینہ۔ اوپارے کہ قدرتی آفت آک اسہ دے اٹی سال آتا شونداری ءِ نسخان تننگ کیرہ، موسمیاتی بدلی تا بابت خطرہ غاتیٹی ودکی نا رداٹ نن خطرہ غاتیٹی کمتی ءِ تینا موسمیاتی و شونداری ڈٹ آتا بشخ جوڑ کننگ و ہمو بندغ آتا رکھ اکن شریداری ءِ سوگو کننگ کن کاریم کننگ اُن ہرا کل آن زیات خطرہ غاتا گواچی ءُ۔