نوشکے، پولیو ٹیم آ سم کاری، اِرا پولیس کارندہ شہید‘ وزیراعلیٰ بلوچستان رپورٹ خواہس

نوشکے نا علاقہ کلی جمال آباد اٹی نادرست سلہہ بند بندغ آک پولیو ٹیم انا سیکورٹی آ تعینات پولیس کارندہ غاتیا سم کاری کرسا 2 کارندہ ءِ شہید کریر و ہنسا اوفتا سلہہ غاتے ہم دریر۔ واقعہ نا حوال رسینگ تون پولیس و انتظامیہ ہند آ سر مرسا لاش تے ہسپتال آ گدریفے۔ حوال نارد اٹ مچ آ ملک آنبار کوئٹہ و بلوچستان اٹی پولیو مہم برجا ءِ و نوشکے ٹی پولیو ٹیمک چناتے پولیو آن بچفنگ نا پڑی کنفنگ ئسر کہ پولیو ٹیم انا سیکورٹی آ سلوک پولیس کارندہ غاتیا نادرست سلہہ بند بندغ آک کلی جمال آباد اٹی سم کاری کریر ہرانا سوب آن 2 پولیس کارندہ محمد یاسر و عبدالرؤف شہید مسر۔ واقعہ غان علاقہ ٹی بھیم و خلیس تالان مس‘ جلہو گیر آک ہننگ نا وخت آ پولیس کارندہ غاتا سلہہ غاتے ہم دریر۔ پولیس ہند آ سر مرسا میت آتے ہسپتال آ گدریفے ہرافتے المی کارروائی آن پد پدخاہوت آتے تننگا۔ واقعہ غان پد پولیس علاقہ ءِ گھیڑ کرسا دوبہ دار آتے پٹنگ نا بناءِ کرے۔ وزیراعلیٰ بلوچستان میر سرفراز بگٹی نوشکے نا علاقہ کلی جمال آباد اٹی پولیو تور ٹیم انا سیکورٹی آ سلوک پولیس کارندہ غاتیا سلہہ بند آ بندغ آتا سم کاری ٹی اِرا پولیس کارندہ نا شہید مننگ آ ڈکھ و ارمان کرسا محکمہ داخلہ بلوچستان آن رپورٹ خواہسنے‘ وزیراعلیٰ میر سرفراز بگٹی پارے کہ پولیو تور ٹیم تا سیکورٹی آ سلوک کارندہ غاتے شست کننگ بھاز است ہسونی ناسوب و مذمت نا قابل واقعہ اسے۔ شہید پولیس کارندہ غاک تینا زمواری تے سر ترسا جان تے ندر کریر اوفتا قربانی تے مدام یات تخنگک۔ او شہید پولیس کارندہ غاتا پدخاہوت آتتون ہمدردی و است ہسونی نا درشانی ءِ کرسا پارے کہ ڈکھ نا دا ساہت اٹی ماتنی خاہوت آتا غم اٹ بریبر نا شریدار اُن۔ وزیراعلیٰ پارے کہ پولیس کارندہ غاک زمواری تے سر ترساتینا جان تے ندر کریر ہراڑا اوفتے خراجِ عقیدت پیش کینہ۔ میر سرفراز بگٹی پارے کہ واقعہ نا سوب و اونا زموار آتے پک کننگ کن پولیس نا کنڈ آن جاست پاست برجا ءِ۔ تعلقدار ادارہ غاک کل پالو تا جاچ ءِ ہلنگ اٹی ءُ‘ جاست پاست آن مستی راستکیک پاش مریرہ۔ وزیراعلیٰ پارے کہ پولیو تور مہم چناتے اسہ ہلوک ناجوڑی اسے آن بچفنگ نا قومی کوشست اسے، دا مہم اٹ تعلقدار ٹیم تا رکھ بھاز اہم ءِ۔ او شہید پولیس کارندہ غاتا درجہ غاتا بڑزی و پدخاہوت آتیکن صبر انا دعا کرے۔