اسلام آباد آ جلہو کروک آتے سخت ورندی تننگک،بنجائی وزیرداخلہ

لاہور، بنجائی وزیر داخلہ محسن نقوی سخت لوز آتے ٹی وارننگ ترسا پارینے کہ اسلام آباد آ جلہو کننگ نا کوشست کننگا تو سخت نتیجہ تون مون تروئی تمک۔ خیبر پختونخوا ٹی سیکورٹی نا حالیت آک کل انا مون آٹو۔ تدوک آ منہ دے اٹی دہشت گردی نا واقعہ غاتیٹی کیپٹن، ورنا و پولیس کارندہ غاک شہید مسر، ہرافک پاکستان نا شہید آک ءُ و کل ءِ اوفتا جنازہ غاتیٹی بشخ ہلوئی ئس۔ لاہور اٹی نیوز کانفرنس کرسا او پارے کہ خیبر پختونخوا ٹی شہید آتا جنازہ غاتیٹی صوبائی حکومت نا اسہ باسک اس ہم بشخ ہلتو، دا بے حسی اسے‘ سیاسی جھیڑہ غاک اخس کہ مریر، اوفتے دا دنگ اسکان دروئی اف‘ صوبہ نا حالیت آتے مچ آ پاکستان خننگ اٹی ءِ۔ وزیر داخلہ پارے کہ خیبر پختونخوا غان اسلام آباد آ جلہو کننگ نا دعویٰ کننگ نگ ءِ ہر کس ہم اسلام آباد آ جلہو کننگ نا کوشست کرے اودے سخت ورندی تننگک۔ داسہ ہم وخت ارے او بند گلی ٹی ہنپس‘ دا وڑ وڈول تیان تینا و تینا بندغ آتا نسخان ءِ کپس۔ محسن نقوی پارے کہ اگہ لانگ مارچ مس تو اسلام آباد ہائیکورٹ نا پرمان آ پورو آن پورو عمل کننگک و ہرا کانودی کسر مس اودے کاریم اٹ اتنگک۔ حکومت تینا زمواری تے پورو کیک‘ ہچ وڑ انا سودا بازی مفک۔ دا وار دن مفک کہ لانگ مارچ برے و 10 یا 20 دے اسکان ملک بند مرے‘ حکومت دا وار مدامگی لائحہ عمل جوڑ کیک‘ او پارے کہ پی ٹی آئی سرکڑدہ غاتا گیشتری لانگ مارچ خواپک‘ لانگ مارچ کروک آتا جند ءِ ہم سما اف کہ اوفتا خواست آک انت ءُ۔ سٹی آ گام تیان ہچ دوئی مفک، حکومت کانود نا رِد اٹ کاریم کیک کس انا پاننگ ءِ ہُپک۔ بانی پی ٹی آئی نا ہسپتال اٹی درمان نا بابت محسن نقوی پارے کہ درمان نا نا آسراتی مستین ہم فراوان کننگانے و ننکان ہم اودے ہننگانے‘۔ درمان و ہننگ کن کانود نا رِد اٹ ہر وڑ انا آسراتی فراوان کننگک۔ وزیر داخلہ پارے کہ اوغانستان تانکہ دہشت گرد آتے توتنے حالیت آک جوان مننگ کپسہ۔ پٹرولیم نا بابت او پارے کہ ڈیہہ و جہانی منڈی نا حالیت آتا سوب آن نہاد آتیا زہم تمنگ اٹی ءِ۔