مذاکرات و سفارتکاری امن نا اسٹ انگا کسرءِ،سینیٹرمحمداسحاق ڈار

اسلام آباد، نائب وزیراعظم و وزیر خارجہ سینیٹر محمد اسحاق ڈار پارینے کہ پاکستان جہانی امن و سلامتی و اقوام متحدہ ءِ ہند جوڑ کرسا اسہ گچین و جوان کثیر الجہتی نظام کن تینا پکا ارادگی نا درشانی ءِ کیک، دا دے ننا کل اکن اسہ اہم یات ترفنگ اسے کہ گپ وتران، سفارتکاری و اقوام متحدہ نا چارٹر نا مسخت و اصول آتیا عمل کننگ مدامگی امن دوئی کننگ نا اسٹ انگا وڑ ءِ۔ دفتر خارجہ نا ترجمان نا رداٹ نائب وزیراعظم دا خیال آتا درشانی ءِ جہانی امن نا دے انا وخت آ تینا کلہو اٹ کرے۔ او پارے کہ پاکستان جہانی برادری آن خواست کیک کہ او اقوام متحدہ نا چارٹر ءِ برجا تخسا جہانی کانود نا شرف و جھیڑہ غاتا انصاف اٹ و مدامگی ایسری کن پرامن وڑ اٹ تینا زمواری تے پورو کے۔ نائب وزیراعظم پارے کہ اقوام متحدہ نا امن مشن تیٹی فوجی دستہ فراوان کروک آ اسہ بھلو وخت اسے آن سرجز و صف اول نا ملک اس مننگ نا حیثیت اٹ جہانی امن و سلامتی کن پاکستان نا مدامگی ارادگی پک ءِ۔ او پارے کہ پاکستان جھیڑہ غاتا توننگ و اوفتا ایسری کن گپ و تران و سفارتکاری نا کمک اٹ اسہ جوان نقطہ نظر اسے نا مخ تفی ءِ برجا تخانے، جھیڑہ غاتا پرامن ایسر ی نا حق اٹ ننا سفارتی کوشست آک ہرافتے ٹی ایران و امریکہ نا نیام اٹ خیرخواہی ہم اوار ءِ، ہندا ارادگی نا درشانی ءِ کیرہ۔ او پارے کہ تدوک آ سال کونسل نا کماشی ٹی پاکستان نا کنڈ آن پیش کروک اقوام متحدہ نا سیکورٹی کونسل نا قرارداد 2788 نا امنائی وڑاٹ منظور مننگ جھیڑہ غاتا پرامن ایسر کن میکنزم ءِ سوگو کننگ کن کونسل نا ارادگی نا اسہ اہم امنائی اسے۔ او پارے کہ پاکستان نا موقف ءِ کہ ایسر مفروک جھیڑہ غاک علاقائی و جہانی نزوری ءِ ودفسا کارہ، پاکستان دا ہم سمجھک کہ ہراتم قوم تا امنا کروک آ حق خود ارادیت آن نمن مننگے و اقوام متحدہ نا سیکورٹی کونسل نا قرارداد آتیا عمل درآمد کننگپ تو مدامگی امن دوئی مننگ کپک، دا ہیت درملکی کوزہ نا حالیت آتے ٹی خاص وڑاٹ پیدوارءِ ہرافتے ٹی بھارت نا کانود آن چَپ کوزہ ٹی جموں و کشمیر و مقبوضہ فلسطینی علاقہ غاک اوار ءُ۔ نائب وزیراعظم پارے کہ پاکستان پرامن و شونہال دنیا کن اسیجائی ارادگی ءِ مونی دننگ اٹ پتدار شریدار اسے نا وڑاٹ کڑد ادا کننگ کن تیار ءِ۔