حکومت الس نا بنداوی آسراتی تا رسیفنگ کن گام گیج کننگ اٹی ءِ،صوبائی وزیر لائیو اسٹاک

عفر آباد، صوبائی وزیر لائیو اسٹاک و ڈائری ڈویلپمنٹ سردارزادہ فیصل خان جمالی کوٹ نور محمد جمالی ٹی پوسکنوڑ ویٹرنری ہسپتال نا بنائی دود آن تران کرسا پارینے کہ السی آسراتی و آسودہی کن بنا کروک شونداری ڈٹ آتا پوروی حکومت نا اولیت آتیٹی اوار ءِ و دا وڑ انا ڈٹ آک الس ءِ دراست آسراتی فراوان کننگ اٹی اہم کڑد ادا کیرہ، صوبائی وزیر پارے کہ کوٹ نور محمد جمالی اٹی پوسکنوڑ ویٹرنری ہسپتال نا ڈٹ مسکوہی اسپیکر بلوچستان اسمبلی جان محمد جمالی نا کنڈ آن سلاہ تننگاسس‘ وخت اس کہ او دا مسخت کن تینا ڈغار ءِ ہم فراوان کرے ہرا علاقہ نا الس نا خذمت نا جوزہ نا ڈیک ءِ ایتک، او پارے کہ ڈٹ 2021ء اٹی منظور مننگ آن پد ہم کیہی سوب آتیان ہُرے نا گواچی مسوسس‘ ولے او دا ڈٹ ءِ پوروی اسکان سر کننگ کن المی گام گیج کرے تاکہ علاقہ نا الس ءِ پوسکنوڑ ویٹرنری آسراتیک دوئی مریر، سردارزادہ فیصل خان جمالی پارے کہ علاقہ ٹی پوسکنوڑ ویٹرنری ہسپتال نا بھاز گرج ئس انتئے کہ متکن آ ویٹرنری ہسپتال اسکان ساہدار تے دننگ علاقہ نا بندغ آتیکن سخت ئس، پوسکن آ ہسپتال نا تفنگ آن مالدار آتے تینا ساہدار تا درمان کن آسراتی و آسان رسینگ گیگ دوئی مریک‘ او پیدوار کرے کہ داڑے ساہدار تا درمان مفت کننگک و مالدار آک دا پوسکنوڑ ہسپتال اٹی ساڑی طبی، تشخیصی و سرجیکل آسراتی تیان فائدہ ہرفنگ کیرہ، صوبائی وزیر مستی پارے کہ بلوچستان اٹی لائیو اسٹاک نا بشخ نئے بیرہ میونسپل و خلقی زرگزران بلکہ ہزار آ خاہوت آتا روزگار و زرگزرانی سوگوی تون دراست گنڈوک ءِ‘ ساہدار تا گچین جانجوڑی و وخت آ درمان آن مالداری کروک بندغ آتے زرگزرانی نسخان آن بچفنگ اٹی کمک رسینگک۔