بلوچستان نا ایلو ضلع غاتیٹی خصوصی چناتیکن پین اسکول جوڑ کننگک،اورنگزیب خان کھچی

کوئٹہ،، بنجائی وزیر قومی میرات و دودوربیدہ اورنگزیب خان کھچی و پارلیمانی سیکرٹری راجی آسودہی حاجی ولی محمد نورزئی اسک پارینو کہ خصوصی چناتے آب اٹ تعلیم تون اوار کسب ہم ہیل تننگ انگ ءِ، بلوچستان نا ایلو ضلع غاتیٹی ہم خصوصی چناتیکن پین اسکول جوڑ کننگ نا گرج ءِ، بنجائی حکومت دا بابت صوبائی حکومت ءِ ہر وڑ انا کمک فراوان کیک۔ دا خیال آتا درشانی ءِ اوفک کوئٹہ ٹی اولیکو سینٹر آف ایکسیلنس و ڈیف ریچ سینٹر نا بناءِ کننگ نا دود آن تران کرسا کریر۔ دود اٹی بنجائی سیکرٹری اسد رحمن گیلانی، سیکرٹری راجی آسودہی عصمت اللہ قریشی، ڈائریکٹر جنرل راجی آسودہی سیف اللہ کھیتران، پاکستان پاورٹی ایلیویشن فنڈ انا چیف ایگزیکٹو نادر گل بڑیچ، ڈاکٹر دوست محمد بڑیچ، صوبائی محتسب ہراسیت تور طاہرہ بلوچ، و ایلو کمامدار و شخصیت آک ساڑی ئسر۔ دود اٹی کلام پاک نا تلاوت آن پد اشارہ غاتا زبان اٹی تلاوت نا ترجمہ ءِ ہم پیش کننگا۔ بنجائی وزیر قومی میرات و دودوربیدہ اورنگزیب خان کھچی پارے کہ ڈیف اسکول نا دورہ ءِ کرسا او گمرمحسوس کننگ ءِ، خصوصی چناتیکن دا اسکول ءِ فعال جوڑ کننگ اہم گام اسے، ڈونر آتا کمک اٹ اسٹیٹ آف دی آرٹ اسکول آتا جوڑ کننگ آن خصوصی چناتیکن گچین تعلیمی نظام اس مون آ بریک۔ او پارے کہ اودے یقین ءِ کہ وزیراعلیٰ بلوچستان میر سرفراز بگٹی نا کماشی ٹی صوبائی حکومت خصوصی چناتا ویل آتا سما ءِ، و صوبہ نا چندی ضلع غاتیٹی اوفتے کن پین اسکول جوڑ کننگک۔ خصوصی چناتے تعلیم تون اوار اوار جتا کسب ہم ہیل تننگ انگ ءِ تانکہ اوفک راج انا کاریم اٹ بروک شاری جوڑ مریر۔ او پارے کہ بلوچستان حکومت ءِ بنجائی حکومت نا کنڈ آن ہرا کمک نا گرج مریک، بنجائی حکومت اوڑکن ہر وخت تیار ءِ۔ او پارے کہ بلوچستان نا طالب علم آتتون اوڑدہی و گپ و تران مسنے و حکومت تینا الس نا خذمت نا رد وریسہ ءِ برجا تخک۔ پارلیمانی سیکرٹری راجی آسودہی حاجی ولی محمد نورزئی پارے کہ خصوصی چناتا تعلیم، ہیلکاری و راجی آسودہی کن عملی گام گیج آک برجاءُ و دا بشخ اٹی پین گام گیج آتا گرج ءِ، کمک پروگرام خاص وڑاٹ نیم جان بندغ آتے کن بنا کننگانے۔