ناگ، مون نا سال نا بشامی پر تیان انگور نا باغک بھس، زمیندارک خوار

ناگ، ضلع واشک نا تحصیل ناگ انا ہندی زمیندار تا رِد اٹ رخشان ندی نا سَرچشملہ غان جوانا کمک اٹ باغ تے دیر فراوان کننگاکہ، ولے نوکاپ نا دیر انا سوب آن جو کیہی ہند آتیان کنڈ مرسا بھس مس۔ جو انا بھس مننگ نا سوب آن دیر اباغ تسکان سر مننگ نا جاگہ غا رخشان ندی اٹی ہننگ اٹی ءِ‘ ہرانا سوب آن علاقہ نا کیہی باغ و ایلو فصل آک بھس مسنو، زمیندارک پارینو کہ ناگ انا گیشتری الس نا روزگار ہندا باغ و کشاری پیداوار ءِ۔ آبپاشی نا نظام بحال مفننگ نا سوب آن نئے بیرہ ساڑی فصل آتے نسخان رسینگ اٹی ءِ بلکہ آخبت اٹی ہم باغ تے بھلو گڑتی مون تروک مریک۔ زمیندارک صوبائی حکومت بلوچستان، وزیر کشت وکشار بلوچستان، علاقہ نا السی نمائندہ و ایم پی اے واشک تون اوار محکمہ کشت وکشار نا تعلقدار کمامدار آتیان خواست کرینو کہ ناگ انا بھس مروک آبپاشی نظام نا دمدستی سروے ءِ کرفسا ہلہلہ بنداو آ بحال کننگے تاکہ باغ تے دیر انا فراوانی دوارہ مننگ کے و ہزار آ بندغ آتا روزگار تون تعلقدار دا اہم کشاری بشخ ءِ پین بھسکاری آن بچفنگ مرے۔ (نامہ نگار)