اسسٹنٹ کمشنر پسنی نا کماشی ٹی سرکاری اسکول آتا ہیڈ آتا دیوان

گوادر، پسنی، وزیراعلیٰ بلوچستان میر سرفراز بگٹی نا وژن نا رِد اٹ تعلیمی ادارہ غاتیٹی دوئی وسیلہ غاتا بھرمی، شفاف و وخت آ کاریم اٹ اتنگ ءِ پک کننگ نا رد اٹ اسسٹنٹ کمشنر پسنی خسرو دلاوری نا کماشی ٹی سرکاری اسکول آتا ہیڈماسٹر و ہیڈمسٹریس آتا اہم دیوان اڈ ہلک۔ دیوان اٹی کلسٹر بجٹ نا کاریم اٹ اتنگ و اونا کمک اٹ اسکول آتا گرج آتے پورو کننگ تون تعلقدار باندات آتا جاچ ءِ ہلنگا۔ دا وخت آ اسسٹنٹ کمشنر خسرو دلاوری پارت کرے کہ کلسٹر بجٹ ءِ پورو شفافیت، قاعدہ و ضابطہ و اسکول آتا حقی گرج آتا رِد اٹ کاریم اٹ اتنگے تاکہ دوئی وسیلہ غاتیان طالب علم آتے زیات آن زیات آسراتی فراوان کننگ مرے۔ او پیدوار کرے کہ کلسٹر بجٹ نا کاریم اٹ اتنگ اٹی شفافیت و پرسجوئی ءِ امر کہ مرے پک کننگے و فنڈ انا کاریم اٹ اتنگ نا باقاعدہ ریکارڈ تخنگے۔ اسسٹنٹ کمشنر پسنی پارے کہ تعلیمی ادارہ غاتیٹی آسراتی تا فراوانی و کلسٹر بجٹ نا بھرمی کاریم اٹ اتنگ نا ڈغاری حالیت آتا جاچ ءِ ہلنگ کن اسکول و کلسٹر فیڈنگ اسکول آتا دورہ ءِ کننگک۔ ہراڑے آسراتی و شونداری گرج آتا جاگہ غا جاچ ءِ ہلسا فزیکل ویریفکیشن ہم کننگک۔