ڈپٹی کمشنر خضدار نا گورنمنٹ گرلز ڈگری کالج خضدار نا دورہ

خضدار، صوبائی حکومت نا تعلیم دوست پالیسی نا رِد اٹ ڈپٹی کمشنر خضدار عبدالرزاق ساسولی گورنمنٹ گرلز ڈگری کالج خضدار نا اناگت دورہ ءِ کرے، ہراڑے او گرلز کالج نا جتا بشخ آتا دورہ‘ طالب علم و استاد آتا حاضری ءِ چیک کننگ تون اوار تدریسی عمل نا جاچ ءِ ہلک۔ دا وخت آ پرنسپل گرلز ڈگری کالج خضدار نا انتظامی باندات‘ تعلیمی سرجز و تدریسی عمل نا بابت ڈپٹی کمشنر ءِ جم حوال تس۔ ڈپٹی کمشنر خضدار عبدالرزاق ساسولی کلاس روم تا دورہ کرسا مسڑ طالب علم آتیان تعلیمی سوج کرے و اوفتا تعلیمی لائخی تا جاچ ءِ ہلک۔ درست ورندی تروک مسڑ طالب علم تا است بڈی ءِ کرسا او پارے کہ آب اٹنگا تعلیم، باقاعدہ حاضری و گچین تعلیمی چاگڑد صوبائی حکومت نا اولیت آتیٹی اوار ءِ‘ او گرلز ڈگری کالج نا انتظامیہ و تدریسی کارندہ غاتیا زور شاغا کہ طالب علم آتا گچین تعلیم و ہیلکاری، حاضری ٹی گچینی و تعلیمی آب انا شون تننگ کن تینا زمواری تے پین بھرمی وڑ اٹ سر ایتر۔