پاکستانی گڑا تا جہانی منڈی ٹی شرف کن برآمد آتے ٹی ویلیو ایڈیشن آ خاص چکار کننگے ،وزیرِ اعظم محمد شہباز شریف

اسلام آباد، وزیراعظم محمد شہباز شریف برآمدی صنعت آتے کن پوسکن آ ٹیکنالوجی، پٹ وپول و پوسکنوڑی ءِ مونی دننگ نا پارت کرسا پارینے کہ پاکستانی گڑاتا آب ءِ جہانی آب انا رداٹ جوڑ کننگ، کوالٹی ایشورنس نا نظام ءِ گچین جوڑ کننگ و جہانی آب و ضابطہ غاتا پورو عملدرآمد ءِ المی جوڑ کننگ کن گچین گام گیج کننگے۔ برآمد آتے ٹی ویلیو ایڈیشن آ خاص چکار کننگے تانکہ پاکستانی گڑاتا جہانی منڈی ٹی قدر و گوبر ہڑتوم آتے ٹی ودکی مرے۔ سے شنبے نا دے آوزیرِاعظم آفس نا میڈیا ونگ آن جاری بیان نا رداٹ وزیرِاعظم محمد شہباز شریف نا کماشی ٹی ملکی برآمد آتے ودفنگ و زرگزرانی شونداری نا رفتار ءِ ترند کننگ نا بابت جاچ دیوان اڈ ہلک۔ دیوان اٹی نائب وزیرِ اعظم و وزیرِ خارجہ محمد اسحاق ڈار، بنجائی وزیر رانا تنویر حسین، جام کمال خان، ڈاکٹر مصدق ملک، احد خان چیمہ، محمد اورنگزیب، وزیراعظم نا سلاہکار ہارون اختر، وزیرمملکت خزانہ بلال اظہر کیانی و تعلقدار ادارہ غاتا بڑزکو افسر آک بشخ ہلکر۔ دیوان اٹی برآمد آتا مونی دننگ کن منظور مروک اسٹرٹیجک روڈ میپ آ عملدرآمد نا بابت پیشرفت آ حوال تننگا و پوسکن آ جہانی منڈی تسکان رسینگ، برآمدی بشخ آتا جہانی کہول آ گو بر لائخی ءِ گچین کننگ، برآمدی بشخ آتے ٹی وڑ پہ وڑی، گڑاتا آب اٹی گچینی و کاروباری آسانی تا بابت جتا جتا سلاہ تا جاچ ءِ ہلنگا۔ وزیرِ اعظم پارے کہ برآمد آتے ٹی ودکی ءِ ملکی زرگزرانی شونداری نا بنداو جوڑ کننگے و روایتی بشخ آتتون اوار ایلو بشخ آتے ہم جہانی منڈی تیٹی برآمد کن تیار کننگے، واپارءِ گنج وڑ جوڑ کننگ کن زیات آن زیات بشخ و صنعت آتے برآمدی کاریم تیٹی اوار کننگے، پاکستانی گڑاتا آب ءِ جہانی آب نا رداٹ جوڑ کننگ، کوالٹی ایشورنس نا نظام ءِ گچین جوڑ کننگ و جہانی آب و ضابطہ غاتا پورو عملدرآمد ءِ المی جوڑ کننگ کن گچین گام گیج کننگے۔ وزیراعظم پارے کہ برآمد آتے ٹی ویلیو ایڈیشن آ خاص چکار کننگے تانکہ پاکستانی گڑاتا جہانی منڈی ٹی قدر و گوبر ہڑتوم آتیٹی ودکی مرے۔ وزیراعظم پارت کرے کہ برآمدی صنعت آتے کن پوسکن آ ٹیکنالوجی، پٹ وپول و پوسکنوڑی ءِ مونی دننگے، ملکی زرگزران ءِ پوسکن آخواست آتتون ہم گرنچ کننگ کن ڈیجیٹلائزیشن و پوسکن آ ٹیکنالوجی آن پبی فائدہ ہرفنگے، برآمد کروک آتے مون تروک انتظامی و کاروباری اڑاند آتے چٹفنگے و برآمدی عمل ءِ پین آسان، ترند و شفاف جوڑ کننگے۔ دیوان ءِ پاننگا کہ جہانی مارکیٹ اسکان پاکستانی گڑاتا رسینگ ءِ ودفنگ کن کیہی سنگت ملک آتتون فری ٹریڈ ایگریمنٹ و رعایتی نرخ آتیا واپارنا معاہدہ غاتے کن گام گیج کننگ انگ ءِ، پاکستانی ہارٹیکلچرل گڑاتے برآمد آتے ٹی اوار کننگ کن گام گیج کننگ انگ ءِ، پاکستانی سرجیکل و میڈیکل ازباب آتابرآمد آتے ودفنگ کن جہانی ہسپتال آتا ٹینڈر و پروکیورمنٹ اٹی پاکستانی ایکسپورٹرز نا اوار مننگ نا است بڈی ءِ کننگ انگ ءِ، جہانی کمپنی تے پاکستانی گڑاتیان معلومدار کرفنگ کن ٹیکسپو، ہیلتھ انجینئرنگ اینڈ منرلز شو، فوڈ اینڈ ایگریکلچر و ایلو بشخ آتا بابت نمائش آتے ملک انا جتا جتا شار تیٹی اڈ تننگ انگ ءِ، برآمد آتے ٹی پوسکنوڑی نا مونی دننگ کن انٹیلیکچؤل پراپرٹی کانود آتے ساڑی دور انا خواست اتٓتون ہم گرنچ کننگ آ کاریم برجاءِ، ایکسپورٹ ڈویلپمنٹ فنڈ انا تنظیم نو نا کاریم پورو مسنے و ای ڈی ایف نا کنڈآن کاروباری برادری کن آسراتی تا بابت گام گیج کننگ انگ ءِ۔