پاک و چین نا السی رابطہ و اقتصادی کمکاری ءِ ودفنگ المی ءِ،آصف علی زرداری

اسلام آباد، صدر مملکت آصف علی زرداری پارینے کہ پاکستان و چین نا نیام اٹ اسٹریٹجک تین پہ تینی پت ءِ برجا تخنگ و پین سوگو جوڑ کننگ کن بڑزکو کہولی ہل وتس تا ریسہ‘ السی کہول آ رابطہ غاتا مون آ دننگ و اقتصادی کمکاری ءِ پین ودفنگ المی ءِ۔ سے شنبے نادے آ ایوانِ صدر نا پریس ونگ آن جاری بیان نا رداٹ او دا خیال آتا درشانی ءِ چین اکن پاکستان نا پندار سفیر ڈاکٹر سید علی اسد گیلانی تون ہیت وگپ کرسا کرے ہرا ایوانِ صدر اٹ اوڑتون اوڑدہی کرے۔ دا وخت آ سینیٹر سلیم مانڈوی والا ہم ساڑی ئس۔ صدر مملکت پارے کہ چین اتون تعلقداری پاکستان نا خارجہ پالیسی نا کل آن اہم پلوءِ۔ او ہڑتوم آ ملک آتا نیام اٹ سوگو سیاسی خیرخواہی ءِ پین اقتصادی و صنعتی کمک اٹ بدل کننگ آزور شاغا۔ صدر مملکت سی پیک 2.0 نا رداٹ بزنس ٹو بزنس کمکاری آ چکار نا ستا خاص وڑ اٹ ورناتے کن کسبکاری نا مونی دننگ و روزگار نا وارخواہی ودی کننگ نا بابت پوسکن کشت وکشار، اے آئی و پوسکن آ ٹیکنالوجی تا بشخ آتیٹی کمک نا اہمیت آ زور شاغا۔ او پندار سفیر ءِ چینی حکومتی ادارہ، کمیونسٹ پارٹی آف چائنا نا سروک، تھنک ٹینکس، تعلیمی ادارہ و میڈیا تون فعال رابطہ غاتے برجا تخنگ و السی کہول آ تعلقداری تے مون آ دننگ نا پارت کرے ہرافتے ٹی طالب علم آتا نا ہن و برہم اوار ءِ۔ او پارے کہ او بروک آ سال ایس سی او سروکی دیوان کن صدر شی جن پنگ نا پاکستان نا دورہ کن ہُروک ءِ۔