بلوچستان نا امن و سوگوی کن سیکورٹی فورس و کانود نافذ کروک ادارہ غاتا قربانیک ستا کڑزرہ، شاہد رند

کوئٹہ، کمکار وزیراعلیٰ بلوچستان حوالکاری و سیاسی باندات شاہد رند قلات اٹی دہشت گرد آتا برخلاف سیکورٹی فورس آتا سرسہب کارروائی تا ستاءِ کرسا فورس آتے خراجِ تحسین پیش کرینے، تینا اسہ بیان اسے ٹی شاہد رند پارے کہ دہشت گردی نا برخلاف سیکورٹی فورس آتا کسبی لائخی‘ جیرات و وخت آ کارراوئیک گمر کڑزرہ۔ امن دشمن آتا برخلاف گچین کارروائیک دا ہیت انا شاہدی ءُ کہ ریاست دہشت گردی نا چٹفنگ کن پورو وڑ اٹ سنرینگوک ءِ‘ او پارے کہ بلوچستان نا امن و سوگوی کن سیکورٹی فورس و کانود نافذ کروک ادارہ غاتا قربانیک گیرام دننگ مفسہ۔ صوبہ نا الس مدام امن دشمن تا برخلاف ریاستی ادارہ غاتا کمک ءِ کرینے و دہشت گردی نا برخلاف قومی جہد اٹ آخبت اٹی ہم تینا کڑد ءِ ادا کرسا کیک۔ شاہد رند پارے کہ دہشت گرد آک بلوچستان اٹی امن، شونداری و شونہالی نا سفر ءِ توننگ اٹ اسُل سرسہب مفسہ۔ حکومت بلوچستان الس نا جان و مال انا رکھ و صوبہ ٹی مدامگی امن کن کل گمانی گام گیج آتے برجا تخانے۔ کمکار وزیراعلیٰ پارے کہ “عزمِ استحکام” نا رِداٹ دہشت گردی نا پورو چٹفنگ کن قومی کہول آ کوشست آک برجا ءُ۔ دہشت گردی نا برخلاف سرسہبیک ریاست نا سوگو عزم و سیکورٹی فورس آتا کسبی لائخی تا ڈیک ءُ۔ او پارے کہ مچ آ قوم سیکورٹی فورس آتتون ہم کوپہ سلوک ءِ۔ دہشت گردی نا پورو چٹفنگ اسکان ریاستی ادارہ و الس نا اسیجائی جہد برجا سلک و بلوچستان اٹی امن و شونداری نا سفر ءِ امر کہ مرے دنی دننگک۔