پاکستان کرغزستان تون تین پہ تینی کمکاری نا مونی دننگ نا خواہندار ءِ،وزیراعظم شہباز شریف

بشکیک، وزیراعظم شہباز شریف پارینے کہ پاکستان کرغزستان تون ہڑتوم آ ملک آتا نیام اٹ کمک نا مونی دننگ و ہڑتوم آ ملک آتا نیام اٹ سنگتی ءِ سوگو کننگ نا خواہندار ءِ ہرا قوم تانیام اٹ امن و کمک نا بابت ننا اسیجائی مسخت ءِ۔ دا رد اٹ اینو ننا بھاز تعمیری و فائدہ ئی ہیت و گپ مسنے ہراٹی واپاری تعلقداری تامونی دننگ آ چکار کننگانے، اوکان پد ہڑتوم آ کنڈآتا کمکاری و اقتصادی رابطہ غاتا مون آ دننگ کن اسیجائی ایم او یوتیا دستخط کننگانے۔وزیراعظم پارے کہ اقتصادی بشخ اٹ کمکاری ننا گپ وتران نا وَت ئس، او دا خیال آتا درشانی ءِ چارشنبے دے پاکستان و کرغزستان نا نیام اٹ چندی آ بشخ آتے ٹی کمکاری نا مون آ دننگ کن معاہدہ غاتا دستاویز آتا ہل/ تس نا دود انا وخت آ اسیجائی نیوز کانفرنس آن تران کرسا کرے۔ پاکستان کرغزستان تون ایلمی تعلقداری تے پین ودفنگ خواہک، نن دا ہیت آ امنا کرینن کہ اقتصادی شریداری تعلقداری تے پین عملی و بھرمی ریسہ نا کنڈآ دننگے، دا بابت عملی گام گیج آتا جامع ڈٹ آ عمل کننگک ہرانا مسخت ہڑتوم آ کنڈآتا واپار نا کچ پدریسہ 200 ملین ڈالر اسکان ودفنگ، واپاری وڑوڈول آتے گچین کننگ، اسیجائی زرکاری نا ڈٹ آتے مون آ دننگ، صنعتی کمکاری ءِ سوگو کننگ و دراست کاروباری رابطہ غاتے ودفنگ ءِ۔ او پارے کہ ہڑتوم آ ملک آتا نیام اٹ معاہدہ و مفاہمت نا یادداشت آتیا دستخط ہڑتوم آ کنڈآتا کمکاری نا مونی دننگ نا اسہ پوسکن ءُ دور اسے نا بناءِ۔ وزیراعظم پارے کہ دا وخت آ پاکستان و کرغزستان نا نیام اٹ ہڑتوم آ کنڈآتا واپار نا کچ بیرہ 16 ملین ڈالر ءِ ہرا ننا سنگتی، ایلمی و سوگو تعلقداری تتون ہچ ءُ وڑاسے ٹی ہم گرنچ اف، ننے دا ہیت ءِ پک کروئی مریک کہ بروک آ اِرا سال اٹ ہڑتوم آ کنڈآتا واپار نا کچ ءِ 16 ملین ڈالر آن ودفسا200 ملین ڈالر اسکان دننگے، دا مشکل ءُ کاریم اس اف۔ وزیراعظم پارے کہ پاکستان نا کاروباری و مالیاتی ادارہ غاتا کرغزستان نا کاروباری و مالیاتی ادارہ غاتا زموار آتون گیشتر رابطہ غاتا ستاءِ کینہ تانکہ ہڑتوم آ کنڈآتا اقتصادی کمکاری نا اسیجائی وژن ءِ مون آ دننگ مرے۔ پاکستان و کرغزستان نا حکومت و پرائیویٹ بشخ انا نیام اٹ واپاری تعلقداری تے ودفنہ۔ رابطہ کاری سویلی ایشیا و نیامی ایشیا نا نیام اٹ اقتصادی تعلقاری تیکن ننا اسیجائی وژن نا وَت ءِ۔ نن راہداری واپار نا معاہدہ نا ستاءِ کینہ ہراڑان ہڑتوم آ کنڈآتاواپار ءِ مونی دننگ مریک‘ سفری آسراتیک گچین مریرہ و علاقائی کہول آ رابطہ غاتیکن پوسکن ءُ وارخواہی ودی مریک۔ وزیراعظم 4 ملکی راہداری معاہدہ غاعملدرآمد نا عزم انا درشانی ءِ کرے و پارے کہ ٹرانسپورٹ، کسٹمز و انتظامی وڑوڈول آتے آسان کننگ آ امنا کننگانے۔ توانائی نا بشخ اٹی کمکاری ننا شریداری نا اہم تمبہ ءِ۔ نن کاسا 1000 ڈٹ انا وخت آ پورو مننگ نا عزم کینہ و بجلی، پن بجلی، بدل گیگ توانائی، توانائی نا بنداوی پنجر و پوسکن ٹیکنالوجی نا بابت عملی کمکاری کن اسیجائی ورکنگ گروپ نا جوڑ مننگ ستاکڑزک۔ ہڑتوم آ ملک آک واپاری کچ ءِ ودفنگ کن کانود آتے پین آسان جوڑ کیرہ۔