ننا ورنا چین اٹی مونی ہننگ نا لائخی ارے‘ گورنر بلوچستان

کوئٹہ، گورنر بلوچستان جعفر خان مندوخیل پارینے کہ ننا ورنا چین اٹی مونی ہننگ نا بود و لائخی ارے‘ گرج دا ہیت انا ءِ کہ اوفتے راست کسر گچین و آب اٹو تعلیم پوسکنوڑ ہیلکاری و روزگار نا گچین وارخواہی فراوان کننگے۔ ورنا تا مخصوص فکری و نفسیاتی حالیت و 21می کرن انا خواست آتا رد اٹ گرج آتے مون آ تخسا اسہ جامع و سوگو ءُ حکمت عملی اس جوڑ کننگ بھاز المی ءِ‘ او پارینے کہ پاکستان خاص وڑ اٹ بلوچستان نا لائخ ا ورنا تا توار ءِ جہانی کہول آ سر کننگ کن نن اقوامِ متحدہ نا ہیڈکوارٹر نیویارک اٹی یوتھ انٹرنیشنل آرگنائزیشن نا کماشی ٹی مروک آ ‘یوتھ اینڈ آرٹیفیشل انٹیلیجنس سمٹ’ اٹی اٹ بشخ ہلسا بلوچستان نا نمائندگی ءِ کرین۔ وخت انا خواست ءِ کہ مچ آ دنیا نا مون آ بلوچستان نا ورناتا لائخی، اوفتا استخواہی و آخبت نا بابت اوفتا تغ تے پورو کننگے۔ گورنر بلوچستان جعفر خان مندوخیل دا خیال آتا درشانی ءِ گورنر ہاؤس کوئٹہ ٹی ورناتا ڈل اسے تون ہیت وگپ کرسا کرے۔ داوخت آ گورنر بلوچستان پارے کہ نن ورناتے آخبت نا جوڑ کروک گوندنگ تون اوار اوار اوفتے زند انا کل اہم انگا بشخ آتیٹی بریبر نا شریدار تکنہ و اوفتے مونی دننگ کن کل گمانی کوشست آتے برجا تخنگک۔