کے پی گورنر راج، ایمر جنسی،پارلیمنٹ نا اسیجائی دیوان، خیبرپختونخوا ٹی ایمرجنسی نا نفاذ نا قرارداد گیشتری نا سلاہ اٹ منظور

اسلام آباد، پارلیمنٹ نا اسیجائی دیوان اٹی خیبرپختونخوا ٹی ایمرجنسی نا نفاذ نا قرارداد گیشتری نا سلاہ اٹ منظور، مخ تفی ٹی 214 و مخالفت اٹی 56 وونٹ بسر۔ پارلیمنٹ نا اسیجائی دیوان اسپیکر قومی اسمبلی سردار ایاز صادق نا کماشی ٹی اڈ ہلک۔ پنچ شنبے نا دے قومی اسمبلی خیبرپختونخوا ٹی ایمرجنسی نا نفاذ نا منظوری تون تعلقدار قرارداد ءِ گیشتری نا سلاہ اٹ منظور کرے۔ وزیر مملکت پارلیمانی باندات طارق فضل چوہدری ایمرجنسی نا نفاذ نا قرارداد ءِ ایوان اٹ پیش کرے۔ طارق فضل چوہدری قرارداد پیش کننگ کن نوٹس نا مد اتون تعلقدار قاعدہ غاتے معطل کننگ نا تحریک ہم پیش کرے، ہرادے گیشتری نا سلاہ اٹ منظور کننگا۔ دا وخت آ اپوزیشن باسک آک برانز کرسا ”نو، نو“، ”گورنر راج نامنظور“ و ”زرگزرانی دہشت گردی نامنظور“ نا نعرہ خلکر۔ اپوزیشن نا برانز نا نیام اٹی اسپیکر دوارہ حساب کرفے و تحریک نا منظوری آن پد کچ انا پڑو ءِ کرے۔ ووٹنگ اٹ تحریک نا مخ تفی ٹی 214 وخت اس کہ مخالفت اٹی 56 وونٹ بسر، ہراکان پد خیبرپختونخوا ٹی ایمرجنسی نا نفاذ نا منظوری تون تعلقدار قرارداد منظور کننگا۔ بنجائی وزیرِ کانود اعظم نذیر تارڑ قومی اسمبلی ٹی خیبرپختونخوا ٹی ایمرجنسی نا نفاذ تون تعلقدار قرارداد آ شرہ نا بناءِ کرسا پارے کہ سینٹ و قومی اسمبلی ٹی دا باندات آ جم گپ وتران مسنے و ہڑتوم آ ایوانک ایمرجنسی نا نفاذ نا منظوری تسر۔ اعظم نذیر تارڑ پارے کہ گورنر خیبرپختونخوا اسہ پورو چٹھی اسے نا کمک اٹ صوبہ نا حالیت آتیان آگاہ کریسس۔ وزیراعظم بنجائی کابینہ نا مون آ ہم کل باندات آتے تخا، وخت اس کہ مذاکرات نا گڈیکو کوشست ہم کننگا۔ بنجائی وزیرِ کانود پارے کہ پشاور تون اوار کیہی ہند آتے ٹی اپیکس کمیٹی نا دیوان اڈ ہلک ولے خراب حالیت آتیان پد ہم صوبہ ٹی تینا فرانزک سائنس لیبارٹری ساڑی اف۔ او پارے کہ اسہ دے اٹ ڈیرہ اسماعیل خان و باجوڑ اٹی واقعہ غاک پیش بسر و نہادی جانک زیان شہید مسر۔ اعظم نذیر تارڑ پارے کہ دا حالیت آتے بایدے آتیٹی وزیراعلیٰ ءِ زہمی علاقہ غاتیٹی ساڑی مروسس ولے وزیراعلیٰ نا زیات چکار شار تا دورہ غاتیا ئس۔ او دعویٰ کرے کہ اسہ سال آن ہم کم وخت اٹ خیبرپختونخوا ٹی دہشت گردی نا 3767 واقعہ مسر و ساڑی حالیت آتیٹی سنجیدگی نشان تننگ المی ءِ۔ بنجائی وزیرِ کانود پارے کہ ایمرجنسی نا نفاذ نا رد اٹ صوبہ نا انتظامی و کانود سازی نا واکداری تعلقدار وڑ و وڈول ءِ پیدوار کننگانے۔ او پارے کہ منہ تپہ دادے مارشل لا نا اسہ دروشم اس گوندنگ اٹی ءُ، ولے حکومت دا گام انا سوب آتے ایوان نا مون آ تخانے و باسک آتا سوج آتا ورندی تے ہم تننگک۔