سرکاری محکمہ غاتا کارکڑد اٹ گچینی کن جوانی اتنگ بھرم آتے ہم گرنچ کننگے،وزیر اعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی نا کماشی ٹی صوبائی محکمہ تا کارکڑدگی نا جاچ ءِ ہلنگ و اصلاحات آ تالان سلاہ تے ترتیب تننگ کن جاچ دیوان ارٹمیکو دے ہم برجاسلیس‘ دیوان اٹی چیف سیکرٹری بلوچستان شکیل قادر خان پین محکمہ تا کارکڑد‘ انتظامی باندات و واکداری کچ اتون تعلقدار جم بریفنگ تس، وخت اس کہ محکمہ غاتا فعال مننگ ءِ گچین جوڑ کننگ و اولسر ٹہیفنگ کن جتا جتا سلاہ تیا سجفنگا۔ دیوان اٹی سرکاری محکمہ غاتا کارکڑد ءِ گچین کننگ، انتظامی پنجر ءِ جوان کننگ، سرکاری وسیلہ غاتا گچین کاریم اٹ اتنگ و الس ءِ خذمت آتا فراوانی نا آب اٹ گچینی اتنگ تون تعلقدار باندات آتا جم جاچ ءِ ہلنگا۔ وزیراعلیٰ میر سرفراز بگٹی پارے کہ سرکاری محکمہ غاتا کارکڑد اٹی گچینی کن اصلاحات آتے عملی بھرم تتون ہم گرنچ کننگ المی ءِ۔ حکومتی ادارہ غاتا فائدہ غاتے پک کننگ‘ اوفتا کارکڑد و الس ءِ فراوان کروک خذمت آک بایدے آب اٹ مریر۔ او دا ہیت آ زور شاغا کہ ہر محکمہ تینا زمواری تے گچین وڑ اٹ سر ایتے و کارکڑد ناکچ ءِ بھرمی کننگے۔ وزیراعلیٰ پارے کہ سرکاری وسیلہ غاتا گچین کاریم اٹ اتنگ و ادارہ غاتا واکداری کچ اٹی ودکی گچین حکمرانی وڑ اکن المی ءِ۔ محکمہ غاتا اولسر ٹہیفنگ و اصلاحات نا عمل اٹی عملی گرج‘ انتظامی کارکڑد و السی فائدہ ءِ بنداوی اہمیت تننگے، تاکہ سرکاری مشینری ءِ زیات فعال و پرسجوئی کننگ مرے۔ او پارے کہ محکمہ غاتا نیام اٹی رابطہ کاری ءِ گچین جوڑ کننگ و زمواری تا سر تننگ اٹ بے گرج اڑاند آتے مر کننگ کن گام گیج المی ءِ‘ محکمہ غاتا زمواری و کاریمی واکداری کچ انا پیدوار کننگ انتظامی باندات اٹ گچینی اتنگ و کارکڑد ءِ ودفنگ اٹی کمک فراوان کیک۔ وزیراعلیٰ بلوچستان دا ہیت آ زور شاغا کہ اصلاحات نا بنداوی مسخت سرکاری ادارہ غاتے زیات گچین کننگ و الس ءِ وخت آ و آب اٹنگا خذمت آتا فراوانی ءِ پک کننگ ءِ۔ او پارے کہ انتظامی پنجر اٹی گچینی کن ہمو سلاہ تے اہمیت تننگے ہرافک حکومتی باندات اٹ شفافیت، پرسجوئی و کارکڑد ءِ شون تننگ اٹی کمک فراوان کیر۔ دیوان اٹی جتاجتا صوبائی محکمہ غاتا ساڑی کارکڑد، انتظامی پنجر و فعال مننگ تون تعلقدار سلاہ تا جاچ ءِ ہلسا اصلاحاتی عمل ءِ بھرمی جوڑ کننگ نا باندات آتیا سجفنگا۔