بنجائی وزیر داخلہ محسن نقوی نا جناح ائیرپورٹ کراچی نا دورہ، امیگریشن سسٹم نا جاچ

کراچی/اسلام آباد، بنجائی وزیر داخلہ محسن نقوی جناح انٹرنیشنل ائیرپورٹ کراچی نا دورہ ءِ کرے و کاؤنٹر تیا امیگریشن نا پراسیس نا جم جاچ ءِ ہلک۔ بنجائی وزیر داخلہ پیشن ملک ہنوک آ مسافر آتتون اوڑدہی کرے و اوفتیان امیگریشن آسراتی و مون تروک ویل آتا بابت سوج کرے‘ وزارتِ داخلہ نا کنڈ آن تدوک آ دے جاری مروک اعلامیہ نا رِداٹ وزیرداخلہ نا دورہ نا وخت آ امیگریشن سسٹم ڈاؤن مس۔ او وخت آ تعلقدار کمامدار آتتون دمدستی ٹیلفونک حوال کرے و امیگریشن سسٹم نا خرابی ءِ دمدستی وڑ اٹ ایسر کننگ نا پارت کرے۔ محسن نقوی پارے کہ سسٹم ڈاؤن مننگ نا حالیت اٹی دمدستی وڑ اٹ بدل گیگ بست و بند ءِ برجا تخنگے۔ او پارت کرے کہ امیگریشن نا ردوریسہ ہچ ءُ حالیت اسے ٹی بایدے سلپ۔ وزیرداخلہ جعلیکاغد و دستاویز آتیا سفر کروک بندغ آتا برخلاف سخت کارروائی نا پرمان کرسا پارے کہ ناپورو و بے پک دستاویز والا مسافر آتے ہچ ءُ وڑ اسے ٹی سفر نا موکل تننگپ۔