نائب وزیراعظم اسحاق ڈار نا لندن اٹی پاکستانی تیان تران‘ پاکستان نا سفارتی و زرگزرانی سرسہبی تا احوال

لندن، نائب وزیراعظم و وزیر خارجہ سینیٹر محمد اسحاق ڈار پارینے کہ پاکستان جہانی کہول آ تینا سفارتی زمواری تے پورو وڑ اٹ سر تننگ اٹی ءِ، ملکی زرگزران نا پہیہ داسہ روان مسنے و برطانیہ نا دا دورہ پورو وڑ اٹ مثبت و سرسہب مس۔ دا خیال آتا درشانی ءِ او لندن اٹی ساڑی پاکستانی کمیونٹی نا اسہ مچی سے آن تران کرسا کرے۔ نائب وزیراعظم پارے کہ پاکستان امریکہ و ایران نا نیام اٹی مروک چک وتاڑ نا وخت آ پورو سفارتی کوشست کرے و ہڑتوم آ ملک آتے اسہ میز آ تولفنگ اٹ اہم ءُ کڑد اس سر تس۔ او پارے کہ پاکستان اینو جہانی کہول آ اسہ متبر و بھلو ہند اس دوئی کرینے، وخت اس کہ پاکستان نا سلہہ بند فوج آک تدوک آ سال ملکی رکھ و بقا کن بہادری و لائخی نا پاش درشانی ءِ کریر ہرا ستا کڑزک۔ سینیٹر محمد اسحاق ڈار پارے کہ نن پاکستان و برطانیہ نا تعلقداری تے پین بڑزکو کہول و پوسکن آ مزل اسکان دننگ خوانہ۔ برطانوی کمامدار آتتون گپ وتران ناوخت آ ہڑتوم آ ملک آتا تین پہ تینی تعلقداری تے پین سوگو کننگ آ پورو وڑ اٹ امنا مسنے۔ نائب وزیراعظم زرگزرانی حالیت آتیا ہیت کرسا پارے کہ پاکستان نا زرگزران اٹی داسہ پورو وڑ اٹ سوگوی بسنے، ملکی پالیسی ریٹ (Policy Rate) 22 درسَد آن کم مرسا داسہ درسَد فیصد آ بسنے۔ او پارے کہ زرگزرانی سوگوی نا دا بھلا ہدف نا پوروی آن پد داسہ حکومت نا چکار ملکی شونداری و شونداری ردوم آٹے۔ او پارے کہ زرگزرانی شونداری نا سوب آن ہربندغ نا کٹیا ٹی ودکی مریک و لس الس نا زند انا آب پین گچین و جوان مریک۔