شاری تا رکھ اکن پوسکن چاروکی نا نظام ءِ کل علاقہ غاتسکان ودفنگک،وزیراعلیٰ بلوچستان میر سرفراز بگٹی

کوئٹہ، وزیراعلیٰ بلوچستان میر سرفراز بگٹی پارینے کہ بلوچستان سیف سٹی اتھارٹی امن و ایمنی، ڈوہ تا توننگ و شاری تا جان و مال انا رکھ اکن گچین کڑد ادا کننگ ءِ، پوسکن آٹیکنالوجی نا گچین کاریم اٹ اتنگ آن ڈوہ و شکبر سرجزآتا وخت آ پیدواری ءِ کرسا پولیس نا رسپانس میکنزم ءِ پین گچین جوڑ کننگ مریک۔ دا خیال آتا درشانی ءِ او بلوچستان سیف سٹی اتھارٹی نا بڑزکو کہولی دیوان نا کماشی ءِ کرسا کرے۔ دیوان اٹ بلوچستان سیف سٹی اتھارٹی نا کارکڑد، چاروکی نانظام، ڈوہ تا توننگ و ادارہ نا کاریمی کچ اٹی ودکی نا بابت باندات نا سرجمی اٹ جاچ ءِ ہلنگا۔ آئی جی پولیس بلوچستان محمد طاہر خان دیوان ءِ بلوچستان سیف سٹی اتھارٹی نا کارکڑد و چندی گام گیج آتا بابت سرجمی اٹ حوال تس۔ حوال اٹ پاننگا کہ سیف سٹی نا گچین چاروکی نا نظام نا کمک اٹ مچ آ ملک آن دُزی مروک آ 138 گاڈی تا پیدواری ءِ کننگا، وخت اس کہ 9 شکبر سرجزآتا وخت آ پیدواری ٹی دہشت گردی نا بھلاکارروائی تے توننگ اٹ کمک رسینگا۔ دیوان ءِ پاننگا کہ بلوچستان سیف سٹی اتھارٹی چندی ڈوہ تا جاگہ غاتابابت پولیس ءِ 631 اہم شاہدی فراوان کرے، ہرافتا کمک اٹ ڈوہ تا جاست وپاست و دوبہ دار آتسکان سرمننگ نا عمل ءِ گچین جوڑ کننگ اٹ کمک دوئی مس۔ حوال اٹ مستی پاننگا کہ 15 مددگار ایمرجنسی رسپانس سروس ءِ سی ٹی ڈی تون اوار کننگانے، ہراڑان ہلہلہ ئی حالیت آتیٹی رسپانس و تعلقدار ادارہ غاتا نیام اٹ رابطہ ءِ پین گچین کننگ اٹ کمک رسینگک۔ وزیراعلیٰ میر سرفراز بگٹی سیف سٹی اتھارٹی نا کارکڑد نا ستاءِ کرسا پارے کہ پوسکن آ ٹیکنالوجی نا کمک اٹ ڈوہ تا توننگ نا عمل ءِ پین ترند کننگے و مانیٹرنگ نظام ءِ پوسکن آ خواست آتتون ہمگرنچ کننگے۔ او پارے کہ سیف سٹی نظام ءِ پین سوگو و پوسکن آ خواست آتتون ہم گرنچ کننگ حکومت نا اولیت آتیٹی اوار ءِ۔ ڈوہ و شکبر سرجزآتا وخت آ پیدواری آن پولیس نا کارروائی تے پین گچین کننگ مریک و شاری تا جان و مال انا رکھ ءِ المی جوڑ کننگ اٹ کمک رسینگک۔ میر سرفراز بگٹی پارے کہ شاری تا رکھ اکن پوسکن آ مانیٹرنگ نظام ءِ صوبہ نا ایلو علاقہ غاتسکان ودفنگک وخت اس کہ بلوچستان سیف سٹی اتھارٹی نا کاریم نا کچ ءِ ودفنگ کن پنجاب سیف سٹی اتھارٹی نا آزموندہ و چاہنداری آن فائدہ ہرفنگک۔ وزیراعلیٰ پارے کہ بلوچستان سیف سٹی اتھارٹی نا کاریم نا کچ اٹ پین ودکی کن چیف منسٹر پنجاب ءِ چٹھی اس مون تننگک، ہراٹی پنجاب سیف سٹی اتھارٹی نا آزموندہ، تکنیکی کمک و کاریم نا کچ اٹ گچینی کن کمکاری نا خواست کننگک۔ وزیراعلیٰ بلوچستان پارے کہ حکومت بلوچستان امن و ایمنی کن پوسکن آٹیکنالوجی و گچین رسپانس میکنزم ءِ پین سوگو کننگ ءِ۔ پوسکن آ مانیٹرنگ نظام، وخت آ حوال و گچین رسپانس نا کمک اٹ ڈوہ تا توننگ تون اوار اوار شاری تا جان و مال انا رکھ ءِ پین المی جوڑ کننگ مریک۔ او تعلقدار کمامدار آتے پارت کرے کہ سیف سٹی اتھارٹی نا کاریم نا کچ اٹ ودکی، پوسکن آ ٹیکنالوجی نا گچین کاریم اٹ اتنگ و چاروکی نا نظام ءِ پین گچین جوڑ کننگ کن عملی گام گیج آتے ترند کننگے، تانکہ صوبہ ٹی امن و ایمنی و شاری تا رکھ اکن دوئی وسیلہ غاتیان پبی فائدہ ہرفنگ مرے۔ وزیراعلیٰ میر سرفراز بگٹی پارے کہ بلوچستان اٹی پوسکن آ ٹیکنالوجی آ تالان سیکورٹی و چاروکی نا نظام ءِ سوگو کننگ وخت انا اہم گرج ءِ و حکومت دا مسخت کن کل المی وسیلہ غاتے کاریم اٹ اتیک۔