ساڑی ڈیجیٹل دور اٹی غلط معلومداری تا توننگ المی جوڑ مسنے،بنجائی حوالکاری و شینکاری وزیر

اسلام آباد، بنجائی وزیرِ حوالکاری و شینکاری عطاء اللہ تارڑ پارینے کہ ساڑی ڈیجیٹل دور اٹی غلط معلومداری و گمراہ کروک مواد نا بھرمی توننگ المی ءِ‘ ورنا افسر آک عاجزی، عزم‘ زمواری نا احساس تون گون پاکستان نا خذمت ءِ کیر۔ او 54 می کامن ٹریننگ پروگرام نا 217 ہیل کروک افسر آتتون ہیت وگپ کرسا کرے۔ ہرا ڈل انا دروشم اٹ حوالکاری و شینکاری وزارت نا ڈیجیٹل کمیونیکیشن ڈیپارٹمنٹ نا دورہ ءِ کریر۔ ڈل انا باسک آک بنجائی وزیرِ حوالکاری عطاء اللہ تارڑ تون اوڑدہی کریر‘ ہیلکاری دوئی کروک افسر آتا ڈل اٹی بنجائی حکومت نا 12 جتا جتا کسبی گروپ/ سروسز تون تعلقدار217 پروبیشنرز اوار ئسر ہرافتے ٹی 117 نرینہ و 100 زالبول افسر ئسر۔ ہیل کروک افسر آتے حوالکاری و شینکاری وزارت نا کڑد، حکومتی ابلاغ، قومی بیانی نا جوڑجاڑ و تالان کننگ‘ ڈیجیٹل کمیونیکیشن، السی سُج پام و غلط معلومداری تا توننگ نا باندات آ جم بریفنگ تننگا۔ ہیل کروک ورنا افسر آتے غلط معلومداری نا توننگ و السی رابطہ کاری نا بابت آگاہ کننگا۔ بنجائی وزیر پارے کہ سرکاری افسر آتا کسبی لائخی و بھرمی السی خذمت کن کامن ٹریننگ پروگرام اسہ اہم ءُ کڑد اس سر تننگ اٹی ءِ‘ بھرمی حکومتی ابلاغ شفافیت نا شون تننگ‘ الس ءِ راست معلومداری نا فراوانی و ریاستی ادارہ غاتیا الس نا پت ءِ سوگو کننگ اٹی بھاز اہم ءُ کڑد اس ادا کیک۔ عطاء اللہ تارڑ پارے کہ ساڑی ٓ ڈیجیٹل دور اٹی غلط معلومداری و گمراہ کروک مواد نا توننگ المی ءِ‘ دا مسخت کن کسبی، وخت آ و ذمہ دارانہ ابلاغی سُج پام المی ءِ۔ او پارے کہ ورنا افسر آک عاجزی، عزم و زمواری نا احساس تون گون پاکستان نا خذمت ءِ کیر، ورنا افسر آک سرکاری زمواری تے دیانت داری, کسبی چاہنداری و قومی فائدہ ءِ اولیت ترسا پورو کیر۔ ڈل ءِ ڈیجیٹل کمیونیکیشن نا کمک اٹ السی رابطہ کاری، قومی پالیسی و حکومتی گام گیج آتیان الس ءِ معلومدار کننگ نا وڑ و ڈول نا بابت حوال تننگا‘ 54 می کامن ٹریننگ پروگرام نا ہیل کروک افسر آک ڈیجیٹل کمیونیکیشن ڈیپارٹمنٹ نا کنڈ آن تروک بریفنگ ءِ کاریمی گوندسا حکومتی ابلاغ و ڈیجیٹل میڈیا نا کڑد انا بابت استخواہی نا درشانی ءِ کریر۔