نائب وزیراعظم تون سلطنت عمان نا وزیر خارجہ نا اوڑدہی

اسلام آباد، نائب وزیراعظم و وزیرِ خارجہ سینیٹر محمد اسحاق ڈار تون سلطنت عمان نا وزیر خارجہ سید بدر بن حمد بن حمود البوسعیدی اوڑدہی کرے، ہراٹی ہڑتوم آ راہشونک پاکستان و عمان نا نیام اٹ خڑکی و ایلمی تعلقداری تا درشانی ءِ کرسا تین پہ تینی است خواہی نا کل بشخ، خاص وڑ اٹ واپار، زرکاری و السی رابطہ غاتیٹی کمکاری ءِ پین ودفنگ کن بڑزکو کہول انا پدریسہ رابطہ غاتا اہمیت آ زور شاغار۔ چارشنبے نادے آ وزارت خارجہ نا ترجمان نا جاری کروک بیان نا رد اٹ ہڑتوم آ وزیرخارجہ غاتا نیام اٹ اوڑدہی پاکستان عمان اسیجائی وزارتی کمیشن نا ہشتمی دیوان آن مست گچین چاگڑد اٹی مس۔ ہڑتوم آ وزیرِ خارجہ غاک علاقائی حالیت آتیا گپ وتران کرسا مدامگی امن و سوگوی نا مون آ دننگ کن گپ وتران و سفارت کاری نا اہمیت ءِ تالان کریر۔ عمان نا وزیر خارجہ علاقائی امن و سلامتی نا مون آدننگ کن پاکستان نا کوشست آتا ستاءِ کرے وخت اس کہ نائب وزیراعظم و وزیرخارجہ ہم علاقائی امن و سوگوی کن عمان نا تعمیراتی کڑد و اسیجائی استخواہی تا سفت ءِ کرے۔