چاغی ٹی پوسکن آ آئی ٹی ہند انا زُوت باضابطہ وڑ اٹ بناءِ کننگک،ڈپٹی کمشنر چاغی اسماعیل بلوچ

چاغی،ڈپٹی کمشنر چاغی بختیار اسماعیل بلوچ پوسکن تفنگوک آئی ٹی آفس دالبندین نا دورہ ءِ کرے، ہراڑے او شونداری کاریم تا جاچ ءِ ہلک و ماڑی نا جوڑجاڑ نا گڈیکو ریسہ نا جاچ ءِ ہلک‘ داوخت آ او پڑو کرے کہ دا پوسکنوڑ آ آئی ٹی ہند انا بھاز زوت باضابطہ وڑ اٹ بناءِ کننگک ہراڑان علاقہ نا طالب علم آو ورنا تے اسہ آب اٹو تعلیمی و تکنیکی پلیٹ فارم اس دوئی مریک‘ ڈپٹی کمشنر پارے کہ اینو نا دور اٹی ڈگری تون اوار عملی ہنر نا مننگ ہم المی ءِ، و دا آئی ٹی آفس نا فعال مننگ آن پد ورنا تے آن لائن ہیلکاری فراوان کننگک تاکہ او روایتی نوکری تا جاگہ غا تینے آ سیبو کرسا زرگزرانی وتواجہ مننگ نا کنڈ آ بریر‘ او مستی پارے کہ آن لائن ہیلکاری و ڈیجیٹل ہنر ہیل کننگ آن ورنا تیکن اُرا ٹی تولسا روزگار نا بھلو وارخواہی ودی مریک‘ وخت اس کہ فری لانسنگ، ویب ڈویلپمنٹ، ڈیجیٹل مارکیٹنگ و گرافک ڈیزائننگ کون آ بشخ آک نئے بیرہ مالی فائدہ فراوان کیرہ بلکہ جہانی ڈیجیٹل اکانومی ٹی اوار مننگ نا وارخواہی ہم ایترہ۔ آئی ٹی آفس اٹی سافٹ ویئر ڈیزائن، ڈیٹا اینالیٹکس، ای کامرس مینجمنٹ و ایلو پوسکنوڑ کورس درستی راستی کرفنگک ہرافتا کمک اٹ ورناک ملکی و جہانی کہول آ کلائنٹس آتتون آن لائن کاریم کننگ نا لائخ مننگ کیرہ۔ ڈپٹی کمشنر پارے کہ دا آئی ٹی ہند علاقہ نا زرگزرانی و تعلیمی شونداری ٹی مزل نا نشان پک مریک و ورنا تے ڈیجیٹل وڑ اٹ سوگو کرسا نئے بیرہ ہندی بلکہ قومی کہول آ ہم شونداری نا کسر ءِ آوار کننگک‘ وخت اس کہ ضلعی انتظامیہ نا دا کوشست ورنا چین ءِ تینا نت تیا سلفنگ و ملک انا ڈیجیٹل اکانومی ءِ شون تننگ نا کنڈ آ اسہ اہم ءُ گام اسے۔ (نامہ نگار)