بریسٹ فیڈنگ چنا و لمہ ہڑتوم آتا جان دراخی کن بھاز اہم تکنگک،ڈائریکٹر ہیلتھ سروسز رخشان

خاران اٹی لمہ نا پال/ انا اہمیت، بریسٹ فیڈنگ نا شون تننگ و لمہ و چنا نا گچین جانجوڑی نا بابت اسہ گچین و مسختی آگاہی پروگرام اسے نا بست و بند کننگا، ہراٹی آگاہی سیمینار تون اوار بریسٹ فیڈنگ آگہی واک ہم اڈ تننگا‘ دا سرجز نا مسخت راج ٹی لمہ نا پال/ نا اہمیت ءِ پاش کننگ، لمہ غاتے بریسٹ فیڈنگ نا فائدہ غاتیان سرپند کننگ و اولیکو شش تُو اسکان بیرہ لمہ نا پال/ کنفنگ نا مثبت وڑ و ڈول ءِ مستی دننگ ئس۔ سیمینار اٹی جانجوڑی محکمہ‘ نیشنل پروگرام، نیوٹریشن پروگرام و ایلو تعلقدار بشخ آتا افسر، طبی کارندہ و ہیلتھ ورکر آک بشخ ہلکر۔ شریدار آک بریسٹ فیڈنگ نا چندی پہلو تیا تینا خیال و آزموندہ غاتا درشانی ءِ کریر و دا ہیت آ زور شاغار کہ لمہ نا پال/ نا بابت راست حوال ءِ ہر اُرا و ہر کمیونٹی اسکان سر کننگ وخت نا اہم گرج ءِ۔ سیمینار آن ڈائریکٹر ہیلتھ سروسز رخشان ڈویژن ڈاکٹر ساجدہ میر، ڈسٹرکٹ ہیلتھ آفیسر خاران ڈاکٹر شیر احمد بلوچ، ڈپٹی ڈی ایچ او ڈاکٹر چاکر انور سیاہ پاد، احترام الحق کبدانی، ڈسٹرکٹ نیوٹریشن کوآرڈینیٹر اصغر صفی، ڈی سی نیشنل پروگرام ڈاکٹر بالاچ نوشیروانی، میل آفیسر انڈس پروجیکٹ حمایت اللہ دوستین، صدر پیرا میڈکس ڈاکٹر کریم جان ملازئی، ڈی ایس او نیشنل پروگرام نازنین مینگل، اے ڈی سی روبینہ و ایلوفک تران کریر۔ ترانکار آک تینا تران اٹی لمہ نا پال/ ءِ چنا کن قدرت نا کنڈ آن عطا کروک گچین و پورو کنِشت گوندار۔ اوفک بریسٹ فیڈنگ نا طبی و غذائی فائدہ غاتیا ہیت کرسا لمہ غاتا است بڈی و کمک فراوان کننگ نا گرج آ زور شاغار۔ او پاریر کہ دراخ جوڑ راج انا بنداو دراخ جوڑ لمہ و چنا تتون گنڈوک مریک۔ اوفک بریسٹ فیڈنگ نا شون اکن جانجوڑی نا بشخ و راج انا نیام اٹی بھرمی رابطہ و اسیجائی جہد انا اہمیت آ ہیت کریر۔ او پاریر کہ جانجوڑی ہند و کمیونٹی نا کہول آ بریسٹ فیڈنگ نا بابت آگاہی سرجز آتے پین بھرمی جوڑ کننگ و لمہ غاتے عملی راہشونی فراوان کننگ آ زور شاغنگانے۔ او بریسٹ فیڈنگ ءِ لمہ و چنا نا جانجوڑی کن اسہ بھاز اہم ءُ سرحال اس گوندسا پاریر کہ لمہ نا پال/ نا بابت سہی آگاہی ءِ ہر اُرا و ہر خاہوت اسکان سر کننگ وخت انا گرج ءِ‘ او دا ہیت آ زور شاغار کہ لمہ غاتے بریسٹ فیڈنگ نا بابت پورو راہشونی‘ است بڈی و جوان ءُ چاگڑد فراوان کننگے تانکہ چناتے زند انا بنائی ریسہ غاتیٹی پورو غذائی بنداو دوئی مننگ کے۔ خاران (رپورٹ محمد عیسیٰ محمد حسنی)