حکومت و صدر تون بے چیٹ حالیت آتیٹی ایمرجنسی آن چَپ پین کسر اَلو،بلاول بھٹو زرداری

اسلام آباد، چیئرمین پیپلز پارٹی بلاول بھٹو زرداری خیبرپختونخوا ٹی ایمرجنسی نا نفاذ نا دفاع ءِ کرسا پارینے کہ دا گام آئین نا رد اٹ کننگانے، حکومت و صدر تون ساڑی حالیت آتیٹی دا گام آن بید پین ہچ ءُ کسر اس اَلو، ولے سیاسی حالیت آتے گچین کننگ کن مذاکرات نا درگہ اینو ہم ملوک ءِ۔ او تحریک انصاف ءِ سلہ خلک کہ او حکومت و ایلو سیاسی جماعت آتتون ہیت و گپ کے، اگہ سیاسی حالیت آک گچین مریر و ایمرجنسی نا گرج سلتو تو او تینٹ وزیراعظم آن اودے چٹفنگ نا خواست کیک۔ قومی اسمبلی ٹی خیبرپختونخوا ٹی ایمرجنسی نا نفاذ نا قرارداد آ تینا خیال آتا درشانی ءِ کرسا بلاول بھٹو زرداری آئین نا تعلقدار شق ءِ خوانسا بنفے و پارے کہ حکومت پاکستان سیاسی ویل انا ایسری کن وس انا کچ آ کوشست کرے۔ او پارے کہ خیبرپختونخوا نا ساڑی حالیت آتیٹی پی ٹی آئی نا صوبائی سرکڑدہ غاتا اہم کڑد ءِ و اپوزیشن نا سرکڑدہ غاتے ہم راستکی تا سماءِ۔ بلاول بھٹو پارے کہ پیپلز پارٹی نا موقف ئس کہ آئینی واکداری ءِ کاریم اٹ اتنگ آن مست اپوزیشن تون گپ و تران کننگے و اونا اعتراض آتے مر کننگے۔ او پارے کہ مذاکرات کروک آ کمیٹی ٹی پیپلز پارٹی نا اِرا نمائندہ ہم اوار ئسر و ننکان اودے حوال تننگا کہ مذاکرات سرسہبی نا کنڈ آ ہننگ اٹی ءُ۔ او پارے کہ اودے واقعی لگاسس کہ ملک اسہ بھلو سیاسی سرسہبی اس دوئی کرینے، ولے ولدا حالیت آک بدل مسر۔ حکومت سیاسی مذاکرات کن اینو بھی سنبرینگوک ءِ۔