امن مشن کن پاکستان نا کوشست آک برجا،فیلڈ مارشل عاصم منیر تہران نا دورہ ءِ کیک،ایرانی وزارت خارجہ

تہران، ایرانی وزارت خارجہ نا ترجمان پارینے کہ فیلڈ مارشل عاصم منیر دوشنبے نا دے تہران نا دورہ ءِ کیک، دورہ نا وخت آ اہم اوڑدہیک مریرہ۔ ایرانی وزارتِ خارجہ نا ترجمان اسماعیل بقائی پارے کہ فیلڈ مارشل عاصم منیر نا دورہ نا مسخت پاکستان و ایران نا نیام اٹی ہڑتوم آ کنڈ انا کمکاری ءِ پین سوگو کننگ ءِ۔ ترجمان نا رِد اٹ فیلڈ مارشل عاصم منیر نا دا دورہ ڈیہہ اٹی امن و سلامتی نا شون اکن پاکستان نا برجاکوشست آتا ردوریسہ اسے۔ دورہ نا وخت آ تین ہ تینی استخواہی نا باندات و ہڑتوم آ کنڈ انا کمکاری نا ودکی آ گپ وتران کننگک۔ داکان مست ایرانی حکومت ایکس آ نوشتہ کرے کہ فیلڈ مارشل عاصم منیر و ایرانی وزیرِ خارجہ عباس عراقچی نا نیام اٹی فون آ حوال مس، ہراٹی علاقائی حالیت و سویلی ایشیا اٹی امن و سوگوی نا بابت گپ وتران کننگا۔ ہندن ایران نا صدر مسعود پزشکیان پارینے کہ نن دا وخت آ پورو زرگزرانی، عسکری و سیکورٹی جنگ اتون مون تننگ اٹی اُن۔ ٹی وی غا شینک مروک تینا تران اٹی ایرانی صدر پارے کہ ایران ءِ پین اسہ وینزویلا اس جوڑ کننگ نا کوشست کننگا، ولے ایران تینا مزاحمت، یکجہتی و سیوت نا سوب آن تینے اسہ ہندن ءُ واکدار اس جوڑ کرسا پاش کرے ہراڑان مچ آ دنیا حیران مس۔ ایرانی صدر مستی پارے کہ ایران نا دشمن آتے دا اومیت ارے کہ او ویل آتا کمک اٹ راج اٹی بشخ و پانٹ شاغنگ کیرہ، نن بشخ و پانٹ، جھیڑہ و ای پرستی آن بچنگ کن تینا وس انا کچ آ پورو کوشست کینہ۔ مسعود پزشکیان پارے کہ ننا قوم اسہ یکتا ءُ کاریم اس سر تسنے، ایران پورو جنگ اٹی ءِ‘ نن اسہ پورو زرگزرانی، فوجی و سیکورٹی جنگ اس کننگ اٹی اُن‘۔ مسعود پزشکیان تینا تران اٹ دا ہم پارے کہ حکومت دا ہیت آ شرمندہ ءِ کہ ملک انا زرگزران ءِ بھاز بھلو ویل مون تروک ءِ۔ او مستی پارے کہ ٹرمپ بھاز آسانی اٹ پاہک کہ او ایران آ کل آن بھس کروک یا سخت رکھ خلیک۔ نن سوگو سلوک اُن و دا بے بریبری جنگ اٹ ہم الس نا خذمت کننگ نا کوشست کینہ۔ ایلو کنڈ آ ایرانی میڈیا تون ہیت وگپ کرسا ایرانی فوج انا ترجمان بریگیڈیئرر جنرل محمد اکرمینیا پارے کہ ایران آ بیٹ تروک جنگ ایرانی فوج انا نظریہ ءِ دفاعی پوزیشن آن فعال و پیش گامی والا سُج پام نا کنڈ آ درے، دانا مسخت دا اف کہ ایران تینٹ جھیڑہ غاتا بناءِ کیک بلکن مسخت دادے کہ ایران ہر وڑ انا بیداد نا رند اٹی دمدستی و بھرمی ورندی تننگ نا بود ءِ برجا تخک۔ جنرل اکرمینیا پارے کہ امریکہ ایران جنگ پوسکن ءُ جغرافیائی و سیاسی پام اس ودی کرینے، جنگ آن آبنائے ہرمز نا اسٹریٹجک اہمیت، ایرانی خارجہ پالیسی نا بابت السی پام اٹی ودکی مسنے۔