بانی پی ٹی آئی دا حکومت نا سیاسی بندی اس اف، پین مقدمہ ہم ارے، احسن اقبال

اسلام آباد، بنجائی وزیر ڈٹ بندی احسن اقبال بانی پی ٹی آئی ءِ سیاسی بندی گوندنگ نا مخالفت ءِ کرسا اوڑا کرپشن و منی لانڈرنگ نا دوبہ غاتے خلک۔ قومی اسمبلی اٹی تینا خیال آتادرشانی ءِ کرسا او پارے کہ بانی پی ٹی آئی دا حکومت نا سیاسی بندی اف، اونا برخلاف مالی باندات و پین مقدمہ غاک ہم اریر‘ او پی ٹی آئی ءِ سلاہ تس کہ او جیل اٹی تینا قائد آن سوج کے کہ ایلوفتے کرپشن نا برخلاف لیکچر تروک آنا جند ہرا دوبہ غاتتون مون تننگ اٹی ءِ۔ احسن اقبال مذاکرات نا باندات ہیت کرسا پارے کہ اپوزیشن نا کنڈ آن مذاکرات بنا کننگ نا ہیت تو کننگا، ولے دا رد اٹ ہم بھاز ہُرے تماسس۔ او تینا ہیت انا حق اٹی پنی آ شاعر منیر نیازی نا حوالہ ءِ ترسا پارے کہ او ہر کاریم اٹی ہُرے کیک، و داڑے ہم مذاکرات نا سلہہ خلنگ اٹی ہُرے مس۔ بنجائی وزیر دوبہ خلک کہ بانی پی ٹی آئی بیرہ غبن کتنے بلکہ منی لانڈرنگ ہم کرے۔ او پارے کہ بانی پی ٹی آئی ملک ریاض نا اکاؤنٹ اٹی زر گدریفے۔ احسن اقبال پی ٹی آئی راہشون تیا مون کرسا اوپارے کہ او جیل اٹی تینا قائد آن سوج کیر کہ ایلوفتے کرپشن نا برخلاف سبخ تننگ آن پد ہم اوڑا تینٹ اخس بھلو دوبہ ءُ۔ او پارے کہ پارلیمنٹ و پاکستان ٹیلی وژن آ جلہو نا واقعہ غاتے یات کننگا تو بانی پی ٹی آئی نا پن ہم مون آ بریک، ہندا وڑ جی ایچ کیو آ جلہو نا باندات اٹی ہم اوڑا ہیت بریک‘ احسن اقبال نا تران ہمو وخت آ مون آ بسنے ہراتم قومی اسمبلی ٹی خیبرپختونخوا ٹی ایمرجنسی نا نفاذ، دہشت گردی نا برخلاف حکمت عملی و سیاسی مذاکرات نا باندات آ حکومت و اپوزیشن نا نیام اٹی شرہ برجاءِ۔ مذاکرات نا بابت او اپوزیشن نا ہُرے کننگ آ تنقید کرے، وخت اس کہ بانی پی ٹی آئی نا برخلاف مالی وڈی خوری تون تعلقدار دوبہ غاتے دوارہ پارے۔