باسک و کارندہ غاتے کورونا، دیوان ءِ پد بٹنگے، ڈپٹی چیئرمین سینیٹ

اسلام آباد(آن لائن) پارلیمنٹ نا باسک و کارندہ غاتیٹی کورونا نا پک مننگ آن پد ڈپٹی چیئرمین سینیٹ قومی اسمبلی و سینیٹ نا دیوان ءِ پد بٹنگ نا سلاہ تسنے۔ جاری کروک بیان اٹی سلیم مانڈوی والا پارینے کہ کورونا وائرس پارلیمنٹ نا راہداری تیٹی ہم سر مسنے۔ پارلیمنٹ نا باسک و کارندہ غاتیٹی کورونا نا پک مننگ گڑتی نا ہیت اسے۔ داکان بیدس ایلو اسک و کارندہ غاتیٹی ہم کورونا نا پک مننگ نا گڑتی ارے۔ کورونا کیس آتیٹی ودکی نا بابت کنا گڑتیک پک مننگ اٹی ءُ۔ ہمے وخت آ پاریسٹ کہ ٹیسٹ آن بیدس کس اسے پارلیمنٹ اٹی پترینگ نا موکل تننگپ۔ سلیم مانڈوی والا پارے کہ ساڑی حالیت اٹی دیوان بٹنگ نا بھاز بھلو خطرناک ءُ پد اس مریک۔ زیات المی اف تو دیوان ءِ پد بٹنگے۔ ٹیسٹ آتا پک مننگ آن پد پارلیمنٹ اٹ پترینگ نا موکل تننگے۔ یات سلے کہ دو شنبے نا دے قومی اسمبلی و سَے شنبے نا دے سینیٹ نا دیوان بٹنگ انگانے۔ ہراڑے کورونا نا حالیت آ شرہ کننگک، وخت اس کہ ضابطہ کار نا رد اٹ دیوان اٹی بشخ ہلنگ کن پارلیمنٹ نا باسک آتا کورونا ٹیسٹ ءِ المی گوندنگانے۔ پارلیمنٹ نا باسک آتا دیوان اٹی بشخ ہلنگ کن ٹیسٹ کرفینو، ہرافتا وڑک آک این آئی ایچ کارندہ غاتے تننگانے۔